1a:T74b,

Azərbaycan təhsil sisteminin məzmununu müasir dünyanın sürətinə uyğunlaşdırmaq üçün növbəti strateji addım atılacaq.

Sfera.az xəbər verir ki, bu sözləri təhsil eksperti Kamran Əsədov sosial media hesabında paylaşıb.

O bildirib ki, dünya təcrübəsi göstərir ki, son 15 ildə 28 ölkə 17 yeni fənni tədris planına salıb, süni intellekt, rəqəmsal savadlılıq, robototexnika, dizayn düşüncəsi, ekoloji dayanıqlılıq kimi sahələr tədris olunur.

“Estoniya, Sinqapur, Cənubi Koreya bu dəyişikliyi tətbiq edəndən sonra şagirdlərin tətbiqi bacarıqlarında 12–18% yüksəliş əldə ediblər. Bizim isə PISA 2022 nəticələrinə görə “tətbiqi bacarıqlar indeksimiz” OECD ortasından 80–92 bal aşağıdır. Yəni faktoloji bilik var, amma real bacarıqlar, analitik düşüncə və yaradıcı tətbiq hissəsi zəifdir. Bu boşluğu doldurmaq üçün yeni fənnin əlavə edilməsi məntiqi və elmi əsaslara söykənən qərardır”.

Kamran Əsədov bildirib ki, yeni fənn şagirdlərə XXI əsrin bacarıqlarını verəcək, tətbiqi düşünmə və texnoloji savadlılığı gücləndirəcək, təhsili rəqəmsal və innovativ mühitə yaxınlaşdıracaq:

“Azərbaycanda yeni fənlərin tədrisi zərurətdir, dünya gedir, əmək bazarı dəyişir, iqtisadiyyat yenilənir. Təhsil də buna uyğunlaşmalıdır. Elm və Təhsil Nazirliyinin bu qərarı məhz bu uyğunlaşmanın vacib hissəsidir”.

Bəsti Rəfizadə
Sfera.az

“Orta məktəblərdə yeni fənn tədris olunacaq” – EKSPERT