Süni intellekt getdikcə musiqi sənayesində öz izini qoyur. Süni intellekt texnologiyasından istifadə edilərək yaradılan virtual sənətçi Xania Monet hit reytinqlərdə ilk 30-luğa daxil olub və “Hallwood Media” ilə 3 milyon dollarlıq müqavilə imzalayıb.

Sfera.az xəbər verir ki, Xania layihəsi Missisipi şairi və yazıçısı Telisha "Nikki" Jones (Telişa Cons) tərəfindən hazırlanıb. Jones süni intellekt platforması “Suno”dan istifadə edərək şeirlərini mahnılara çevirib və Xania Monet adlı virtual sənətçini yaradıb.

Xania Monetin meneceri Romel Merfinin sözlərinə görə, virtual müğənni sadəcə bir süni model deyil, “texnologiya ilə gücləndirilmiş insan yaradıcılığıdır”:

“Biz süni intellektdən dinləyicilərə real hekayələri və hissləri çatdırmaq üçün bir vasitə kimi istifadə etdik. Musiqi və mənalar insandır, süni intellekt isə onları həyata keçirməyə kömək edir,” - deyə Merfin CNN-ə verdiyi müsahibədə bildirib.

Xania Monetin “How Was I Supposed to Know” adlı hit mahnısı əvvəlcə TikTok-da yayımlanıb, daha sonra Billboard siyahılarına düşüb. Cəmi dörd ay ərzində virtual sənətçi “Spotify”da 44 mahnı yayımlayıb, 1,2 milyon dinləyici və sosial mediada təxminən 800.000 izləyici toplayıb.

Böyük uğuruna baxmayaraq, musiqi sənayesində hər kəs bu fenomeni qəbul etməyib. Bəzi sənətçilər süni intellektin həqiqi sənətçilərin yerini ala biləcəyindən və etiketlərin insan istedadı əvəzinə texnoloji modellərə investisiya qoymasından narahatdır.

Telişa Cons isə bunu təhlükə kimi görmür: “Mən müğənni deyiləm, amma yaradıcıyam. Süni intellekt sadəcə şeirlərimi həyata keçirməyimə kömək edən bir vasitədir. Əsl sənət yenə də insandır,” - deyə Cons bildirib.

Aynil

İnsan olmadan Ulduz Oldu - 3 milyon Dollar Qazandı