Yaponiyanın cənubundakı Kyuşu sahillərində yerləşən Okinoşima adası mistikası və qədim dini əhəmiyyəti ilə tanınır. Min ildən artıqdır Şinto inancında müqəddəs sayılan bu ada hazırda UNESCO-nun Dünya İrsi Siyahısına daxildir. Onu fərqləndirən xüsusiyyət isə təkcə tarixi deyil – ada qadınlar üçün tamamilə bağlıdır.

Sfera.az xəbər verir ki, əsrlər boyu davam edən bu qadağa mənşəyi tam dəqiqləşdirilməmiş qədim ənənələrə əsaslanır.

Okinoşima Yaponiyanın Munakata bölgəsində yerləşir və Şinto inancında müqəddəs məkan sayılır. Əsrlər boyu yapon dənizçiləri bu adanı dəniz tanrılarının həsr olunduğu ziyarətgah kimi qəbul ediblər. Dəniz səfərinə çıxmazdan əvvəl onlar adaya gələrək Taqorihime adlı ilahəyə qurbanlar təqdim edirdilər. Buna görə də Okinoşima uzun illər “dənizçilərin qoruyucusu” kimi tanınıb.

Hazırda ada ictimaiyyət üçün tam bağlıdır. Buraya yalnız Şinto keşişlərinin daxil olmasına icazə verilir. Keşişlər adada növbəli şəkildə hər 10 gündən bir qalır və iki əsas vəzifə daşıyırlar: ilahəyə dua etmək və qədim qaydalara uyğun olaraq adanı qorumaq. Adadakı ziyarətgah Okitsu-miya adlanır və Munakata Taisha adlı daha böyük ziyarətgah kompleksinin bir hissəsidir.

Okinoşimanın ən çox diqqət çəkən xüsusiyyəti qadınlara tam qadağan olunmasıdır. Bu qadağanın dəqiq səbəbi barədə yazılı mənbə yoxdur. Ən çox qəbul edilən izah Şintoizmdəki “çirklənmə” anlayışı ilə əlaqələndirilir. İnanclara görə, xüsusilə menstrual qan müqəddəs məkanları çirkləndirə bilər, bu da tarix boyu qadınların bəzi dini mərasimlərdən kənarda qalmasına səbəb olub.

Bəzi tədqiqatçılar isə hesab edirlər ki, bu qayda təhlükəsizlik məqsədi daşıyıb. Adanı əhatə edən dəniz suları olduqca təhlükəlidir və qadınların bu çətin səfər zamanı zərər görməməsi üçün belə bir məhdudiyyət qoyulub. Başqa bir fərziyyəyə görə isə adanın himayədar ilahəsi Taqorihimenin “qadın rəqiblərini sevməyən ruh” olduğuna inanılırmış və bu səbəbdən qadınların adaya girməsi tabu hesab edilirdi.

Keçmişdə hər il 27 may tarixində keçirilən xüsusi mərasimdə adaya yalnız 200 kişi buraxılırdı. Bu şəxslər səfərdən əvvəl “misogi” adlı təmizlənmə ayinindən keçməli idilər. Kişilər dənizdə çimərək mənəvi təmizlənmədən sonra adaya daxil olurdular. Bundan başqa, adaya girən heç kim orada gördükləri barədə danışa və ya oradan bir əşya – hətta bir yarpaq belə – apara bilməzdi.

Əsrlər boyu adada keçirilən dini mərasimlər böyük bir mədəni irs qoyub. Bu günə qədər Okinoşimada 80 mindən çox artefakt tapılıb. Onların arasında şüşə parçaları, qızıl üzüklər, bürünc güzgülər və bəzək muncuqları var. Bu tapıntıların çoxu hazırda Kyuşudakı Munakata Taisha Muzeyində saxlanılır və Yaponiyanın milli xəzinələri hesab olunur.

UNESCO-nun Dünya İrsi Siyahısına daxil edilməsinə baxmayaraq, Okinoşima turizm üçün hələ də qapalıdır. Ada bu gün də bir Şinto keşişinin himayəsindədir və qədim qaydalar qüvvədə qalır: qadınlara giriş qadağandır, kişilər isə adanı yalnız uzaqdan – sahildəki terrasdan – seyr edə bilirlər.

Aynil

Qadınların ayaq basa bilmədiyi sirli ada – Okinoşima