Avropada gərginlik artır. Almaniya hökuməti son aylarda vətəndaşlara fövqəladə hallara hazır olmağı tövsiyə edir. İlk yardım çantalarının hazırlanması, sığınacaq yerlərinin müəyyənləşdirilməsi, metro və muzeylərdə təhlükəsiz zonaların yaradılması kimi çağırışlar diqqət çəkib.

Eyni zamanda Berlin ordusunu gücləndirmək istiqamətində sürətli addımlar atır. Bütün bu addımlar “Almaniya Rusiya ilə müharibəyə hazırlaşırmı?” sualını gündəmə gətirib.

Məsələ ilə bağlı politoloq Samir Hümbətov Sfera.az-a açıqlamasında Almaniyanın narahatlığının səbəblərini şərh edib.

Ekspertin sözlərinə görə, Berlinin əsas problemi hazırda Rusiya kimi hərbi gücə qarşı dayana biləcək səviyyədə ordusunun olmamasıdır:

“Almaniyanın narahat olma səbəbi odur ki, onun əlində hazırda potensial ordu imkanları yoxdur. Burada söhbət sıradan bir ordudan yox, məhz Rusiyanın qarşısında dura biləcək gücdə hərbi qüvvədən gedir. Düzdür, Almaniyanın ordusu mövcuddur, lakin o, Rusiya ilə qarşıdurma apara biləcək səviyyədə deyil”.

Politoloq qeyd edib ki, Berlin hazırda bu çatışmazlığı aradan qaldırmaq üçün bir sıra hərbi layihələr həyata keçirir:

“Hazırda Almaniya hökuməti ordunu gücləndirmək istiqamətində geniş layihələr həyata keçirir. Məqsəd odur ki, gələcəkdə ölkəyə qarşı potensial təhdid yaranacağı təqdirdə Almaniya özünü müdafiə edə bilsin. İkinci Dünya müharibəsindən sonra faşist Almaniyasının məğlubiyyətindən dolayı ölkəyə ordu saxlanması və hərbi fəaliyyətlə bağlı ciddi məhdudiyyətlər qoyulmuşdu. Uzun illər bu məhdudiyyətlər nəticəsində Almaniyanın ordusu zəif vəziyyətdə qaldı. ABŞ-nin, xüsusilə də Donald Trampın prezidentliyi dövründə NATO ölkələrinin təhlükəsizliyi ilə bağlı suallar yaranmışdı. Almaniya görünür ki, bu vəziyyətdən də ehtiyat edir. Buna görə də Berlin Rusiya ilə açıq qarşıdurmaya girmək istəmir. Amma bu, qorxudan deyil, sadəcə, zəif ordu ilə belə riskə getmək istəmir”.

Ekspert hesab edir ki, Almaniyanın hazırkı addımları önləyici xarakter daşıyır və məqsəd Rusiyanın mümkün təhdidinə qarşı əvvəlcədən hazırlıqlı olmaqdır:

“Bu gün Almaniyanın əsas siyasəti ordunu müəyyən səviyyəyə gətirmək, ehtimal edilə biləcək qarşıdurma halında ən azı özünü müdafiə edə bilməkdir. Berlin istəyir ki, Rusiya qarşısında çətin durumda qalmasın və ölkənin təhlükəsizliyini öz resursları ilə təmin edə bilsin. Hazırkı şəraitdə Almaniyanın Rusiya ilə müharibəyə girməsi real görünmür, lakin təhlükəsizlik narahatlıqları ölkəni hərbi baxımdan daha çevik və müstəqil olmağa məcbur edir”.

Bəsti Rəfizadə

Sfera.az

Almaniya hərəkətə keçdi: Müharibə başlayır?