Onlayn ticarət nəhəngi “Amazon” yaxın illərdə işçi qüvvəsinin 75 faizini avtomatlaşdırmağı planlaşdırır. Şirkət 500 mindən çox əməkdaşını süni intellektlə idarə olunan robotlarla əvəz edəcək.

Sfera.az xarici mediaya istinadən xəbər verir ki, “The New York Times” tərəfindən əldə edilən sənədlər “Amazon”un insan əməyindən demək olar ki, tamamilə asılı olmayan, yüksək sürətli çatdırılma məqsədilə fəaliyyət göstərəcək anbarlar qurmaq planlarını üzə çıxarıb.

Məlumata görə, şirkətin robot texnologiyaları üzrə komandası əməliyyatlarının 75 faizini avtomatlaşdırmağı qarşısına məqsəd qoyub. Bu da təxminən 500 min nəfərin işini itirəcəyi anlamına gəlir.

Son 20 ildə ABŞ-də məşğulluğa “Amazon” qədər təsir göstərən ikinci bir şirkət olmayıb. Ölkənin ən böyük ikinci işəgötürəni olan “Amazon” yüz minlərlə anbar işçisi işə götürüb, yeni, lakin mübahisəli bir iş modeli yaradıb və işə qəbul, nəzarət və idarəetmədə texnologiyadan geniş istifadəni təşviq edib.

Hazırda şirkətin ABŞ-də işçi sayı 1,2 milyona yaxınlaşır. Lakin avtomatlaşdırma komandası “Amazon”un 2027-ci ilə qədər 160 mindən çox yeni işçi cəlb etməsinə ehtiyac qalmayacağını bildirir. Bu, şirkət üçün hər məhsul üzrə təxminən 30 sent qənaət deməkdir.

Şirkət rəhbərliyinin proqnozuna görə, 2033-cü ilə qədər satışlar iki dəfə artacaq, lakin robotlaşdırma sayəsində “Amazon” ABŞ-də işçi sayını artırmadan bu artımı təmin edə biləcək.

Nəticədə, “Amazon”un 600 mindən çox yeni iş yerini yaratmasına ehtiyac qalmayacağı qeyd olunur.

Bəsti Rəfizadə
Sfera.az

“Amazon” işçilərinin 75 faizini avtomatlaşdıracaq