Fransa Senatından qəribə qərar - Bu şəxslərin evlənməsi qadağan edildi

Fransa Senatı ölkədə qanuni yaşayış icazəsi olmayan əcnəbilərlə fransız vətəndaşlarının evlənməsini qadağan edən qanun layihəsini təsdiqləyib.

Sfera.az xarici mediaya istinadən xəbər verir ki, yeni qaydaya görə, nikah üçün müraciət edən əcnəbi tərəf mütləq şəkildə Fransadakı hüquqi statusunu təsdiqləyən sənəd təqdim etməlidir.

Hökumət bu addımı “saxta evliliklərin qarşısının alınması” ilə əsaslandırır.

Mərkəzçi senatorlar bildiriblər ki, indiyədək tətbiq edilən zəif nəzarət nəticəsində bir sıra qanunsuz miqrantlar fransızlarla evlənərək deportasiyadan yayınmağa nail olub.

Lakin müxalifətdəki sol senatorlar qərarı sərt tənqid edərək, bunun fərdi azadlıqlara müdaxilə olduğunu və həqiqi münasibətlər yaşayan cütlüklərin də evliliyinə mane ola biləcəyini vurğulayıblar.

Qanunun qüvvəyə minməsi üçün sənədin parlamentdə də müzakirə olunaraq qəbul edilməsi tələb olunur. Yekun təsdiqdən sonra bələdiyyələr nikahdan əvvəl əcnəbi tərəfdən oturum iznini sübut edən rəsmi sənəd təqdim etməsini istəyəcəklər.

Bəsti Rəfizadə
Sfera.az