639 balla tibbi qazanan Cəmşid: "Fikrimi o dəyişdi"

Xəbər verdiyimiz kimi, ali məktəblərə ixtisas seçiminin nəticələri elan olunub. 82883 abituriyentin 55656 nəfəri ali təhsil müəssisələrinə qəbul olunub. 

Yüksək balla ali məktəbə qəbul olan şagirdlərlərdən biri də Rüstəmov Cəmşid Əliağa oğludur. O, 639 balla Azərbaycan Tibb Universitetinin “Müalicə işi” ixtisasında təhsil alacaq. 

Qeyd edək ki, Cəmşid 16 aprel 2023-cü il tarixli buraxılış imtahanında da yüksək nəticə göstərərək 298 bal toplamışdı.

Sfera.az olaraq Cəmşid Rüstəmov ilə əlaqə saxladıq.

- Cəmşid, yüksək nəticə ilə ali məktəbə daxil olmusan. Hansı hissləri keçirirsən? 

-Gözlədiyim yüksək nəticəni əldə etdiyim üçün özümü xoşbəxt sayıram. Mən şadam ki, valideynlərimi sevindirə bildim, çox fərəhlənirəm özümlə və qürur duyuram.

-700 bal hədəfin vardı? Hansı suallarda səhv etmişdin?

-Bəli, istərdim, ancaq texniki səhvlərim oldu.

-İmtahanlarda əldə etdiyin nəticə təkcə öz əməyinin bəhrəsidir, yoxsa repetitorla hazırlaşmışdın? 

-Əlbəttə, bu nəticə nəticə tək mənim əziyyətim ilə əldə olunmadı. Bu müvəffəqiyyətimdə valideynlərimin diqqəti və müəllimlərimin zəhməti danılmazdır.

-Ümumiyyətlə, 2 il ərzində hazırlıq prosesin necə idi? Xüsusi istifadə etdiyin metod var idi?

-Xeyr, xüsusi metodum olmayıb. Sadəcə hər gün inamla çalışırdım. Düzdür, yatmadığım gecələrim də olub, çətinlik çəkmişəm, lakin yenə də təkidlə hazırlaşmışam.
  

-İllər öncə Azərbaycan Tibb Universitetində stomatoloq ixtisasında təhsil almaq istədiyini demişdin. İxtisas fikrini dəyişdirməyinin səbəbi nə oldu?

-Atamın cərrah dostu - məhşur professor Vüqar Fattah-Pur sayəsində fikrim dəyişdi. Onun iş fəaliyyəti ilə söhbət əsasında tanışlığım məni cərrahlığa həvəsləndirdi.  Anladım ki, mənə görə, cərrahlıq daha vacib bir peşədir. Beləliklə, məndə cərrah olmaq arzusu yarandı. İnanıram ki, Vüqar həkim kimi olmasam da, kumirimə layiq həkim olacam.

-Bu il 600-dən çox bal toplayıb ali məktəbə qəbul olmayan abituriyentlər var idi. İstədiyin yerə daxil olmasaydın, təhsilini davam etdirərdin?

-O abituriyentlər üçün çox təəssüflənirəm. Onlar qeydiyyatda daha diqqətli olmalıydılar. Bəli, axı 1 il də ömürdəndir.

-Uğurunun sirri nədir? Yaşıdlarına hansı tövsiyəni vermək istərdin?

-Uğurumun sirri özümə olan inamımdır. Yaşıdlarıma tövsiyə edirəm ki, ilkin qarşılaşdıqları çətinliklər onları həvəsdən salıb qorxutmasın. Deyirlər ki, şagirdlər ancaq və ancaq oxumalıdılar, amma mən bununla razı deyiləm. İnsanın beyni istirahət tələb edir və bir məşğulliyəti başqası ilə əvəz edərək insan özünə istirahət verməlidir. Mən şəxsən telefona da baxırdım, dostlarım ilə də gəzirdim, futbol da oynayırdım, amma hər şey öz qədərində olmalıdır, nə artıq, nə əskik! 

-Hələ bu sual üçün tez olsa da, bakalavr təhsilini başa vurduqdan sonra növbəti pillələrdə də davam etməyi düşünürsənmi?

-İndidən bütün mərhələləri son həddə qədər çatdırmağı qarşımda məqsəd qoymuşam. Allah qoysa, zəhmətim, inadım və iradəmlə məqsədimə nail olacağam.

Firuzə Əliyeva
Sfera.az