Niyə xoşbəxtlik anlayışımızı itiririk? - Psixoloqdan AÇIQLAMA

Bəzi insanlar zaman keçdikcə xoşbəxtlik anlayışını itirirlər. Xüsusilə yaş artdıqca, əvvəllər zövq aldığımız söhbətlər, insanlar və hətta əlamətdar günlər belə adi və sıradan görünməyə başlayır.

Bunun əsas səbəbi nədir?

Sözügedən məsələ ilə bağlı Sfera.az-a açıqlama verən psixoloq Nizami Orucov insanların zamanla xoşbəxtlik qavramını itirməsinin bir neçə psixoloji və sosial səbəbi olduğunu bildirib.

Psixoloqun sözlərinə görə, əvvəla, yaş artdıqca həyat təcrübələri çoxalır və insan gördüklərinə, yaşadıqlarına öyrəşir: “Bu hal “hedonik adaptasiya” adlanır: əvvəl böyük sevinc gətirən hadisələr bir müddət sonra adi hala çevrilir. Digər tərəfdən, gündəlik stress, məsuliyyətlər, iş və ailə qayğıları da insanın diqqətini indiki anın gözəlliklərindən yayındırır”.

N.Orucov əlavə edib ki, bundan əlavə, gənclikdəki həyəcan və yenilik axtarışı yaşlandıqca azalır, insan daha çox sabitlik və təhlükəsizlik axtarır:

“Bu isə bəzən emosional canlılığın zəifləməsi kimi hiss olunur. Əlamətdar günlərin və söhbətlərin əvvəlki kimi həyəcan verməməsi də, əsasən, onların təkrar olunması və gözləntilərin dəyişməsi ilə bağlıdır. Əslində isə xoşbəxtlik itmir, sadəcə formasını dəyişir. İnsan yaşlandıqca onu xoşbəxt edən şeylər fərqli olur: sakitlik, daxili harmoniya, yaxın insanlarla səmimi ünsiyyət və kiçik anların qədrini bilmək daha önəm qazanır. Burada əsas məqam – insanın öz diqqətini nəyə yönəltdiyidir”.

Fidan Hacızadə
Sfera.az