Uğurun Azərbaycan modeli – İlham Əliyevin müəyyənləşdirdiyi siyasi və iqtisadi strategiya
13:00 / 09.03.2021
972
Azərbaycanın son iki onillikdə əldə etdiyi uğurlarda Prezident İlham
Əliyevin müəyyənləşdirdiyi siyasi və iqtisadi xəttin müstəsna rolu var. Artıq
18-ci ildir ki, ölkəmizə rəhbərlik edən İlham Əliyevin prezidentlik dövründə illərlə
yığılıb qalan çoxsaylı problemlər həllini tapdı, ölkənin iqtisadi və siyasi imkanları
gücləndi, əhalinin sosial problemlərinin həllində ciddi dönüş yaradıldı, ordu
gücləndirildi və uzun illərdir ki, işğal altında olan torpaqlar azad edildi.
Bu baxımdan 2003-2020-ci illər Azərbaycanın güclü dövlət konsepsiyasının
reallaşdırılması, siyasi və iqtisadi sabitliyin gücləndirilməsi, torpaqlarımızın
işğaldan azad edilməsi dövrü kimi xarakterizə oluna bilər.
2003-cü ildən ölkəmizdə ilk mühüm uğur sabitliyin və təhlükəsizlik
mühitinin gücləndirilməsi oldu. Həmin dövrə qədər də ölkəmizdə sabitlik və təhlükəsizlik
təmin olunmuşdu. Amma bu tarixdən təhlükəsizliyin daha da gücləndirilməsi 1994-cü
ildə imzalanan "Əsrin Müqaviləsi” layihənin reallaşdırılması üçün əlverişli imkanlar
yaratdı.
"Əsrin Müqaviləsi” ilə bərabər digər enerji layihələrinə başlanıldı və
bunun nəticəsində güclü və dayanıqlı maliyyə-iqtisadi sistem formalaşdırıldı, Azərbaycanın
adı dünyanın aparıcı maliyyə-iqtisadi institutlarının reytinqlərində ön
sıralara çıxmağa başlandı.
İqtisadi imkanların artmasında 2003-cü ildən həyata keçirilən
regionların sosial-iqtisadi inkişafına dair dövlət proqramlarının rolu
böyükdür. İlham Əliyevin təşəbbüsü ilə hazırlanan proqramlarda nəzərdə tutulan tədbirlərin
həyata keçirilməsi əhalinin sosial rifahının yaxşılaşmasına böyük töhfə oldu.
2003-cü ildə 18 manat olan pensiyanın orta məbləği 2020-ci ilin sonunda 330
manata, minimum əməkhaqqı 9 manatdan 250 manata, orta əməkhaqqı 77 manatdan 705
manata, sosial müavinətlərin orta məbləği 10 manatdan 118 manata yüksəldi.
Güclü iqtisadiyyat, möhkəm siyasi iradə müasir və güclü ordu quruculuğuna
da şərait yaratdı. Azərbaycan dövlətinin qətiyyəti sahəsində qurulan güclü ordu
və İlham Əliyevin güclü iradəsi 2020-ci ildə 44 günlük müharibə nəticəsində torpaqlarımızın
işğaldan azad edilməsi ilə nəticələndi.
Torpaqlarımızın işğaldan azad edilməsi çoxsaylı və sistem xarakterli
tədbirlərin sayəsində mümkün oldu. Yəni, sadəcə güclü ordu yaratmaqla işğala
son qoymaq mümkün deyildi. Ordu quruculuğu ilə bərabər vətənpərvərlik hisslərinin
gücləndirilməsi, gənc nəslin milli vətənpərvərlik ruhunda yetişməsi, müstəqil
daxili və xarici siyasət işğala son qoyulmasına töhfəsini verdi.
Azərbaycan dünya miqyasında nadir ölkələrdəndir ki, tam müstəqil şəkildə
öz daxili, xarici siyasətini aparır, öz dostlarını özü seçir, heç kimin
qabağında baş əymir, heç kimə hesabat vermir. Ermənistanın işğalçı siyasətinə
son qoyulması üçün Azərbaycan xalqının haqq işində mənəvi-psoxoloji hazırlığın
təmin edilməsi, Azərbaycan həqiqətlərinin, Azərbaycan xalqının haqlı tərəf
olmasını əsaslandıran tarixi, hüquqi, geosiyasi reallıqların dünya ictimaiyyətinə
çatdırılması, Ermənistanın işğalçı siyasətinin dünyada ifşa olunması və Azərbaycanın
təcrid siyasətinin Ermənistanı bütün regional layihələrdən kənarda saxlaması, bunun
nəticəsində iqtisadiyyatını çökdürməsi düşmənin zəiflədilməsinə ölkəmizin daha
güclü tərəfə çevrilərək müharibədə zəfər əldə etməsinə kömək etdi.
Vasif
Sfera.az