“Rusiya–Ukrayna müharibəsi tezliklə bitməyəcək” – Politoloq

ABŞ Prezidenti Donald Tramp Rusiya–Ukrayna müharibəsinin yaxın vaxtlarda yekunlaşacağına şübhə etdiyini bildirib. Onun bu mövqeyi münaqişənin uzunmüddətli xarakter ala biləcəyi ehtimallarını gücləndirir.

Bəs bu müharibə SSRİ-Əfqanıstan müharibəsi kimi illərlə davam edə bilərmi?

Mövzu ilə bağlı Sfera.az-a açıqlama verən politoloq Züriyə Qarayeva qeyd edib ki, Trampın şübhələri əslində reallığı düzgün qiymətləndirməsindən irəli gəlir:

“Rusiya–Ukrayna müharibəsi artıq uzun müddətdir davam edir və tərəflərin kompromisə meylli olmadıqları açıq görünür. Moskva işğal etdiyi ərazilərdən geri çəkilmək niyyətində deyil, Kiyev isə ərazi bütövlüyündən imtina etməyi qəti şəkildə rədd edir. Bu, münaqişənin sürətli həllini mümkünsüz edir”.

 

Politoloqun sözlərinə görə, SSRİ-nin Əfqanıstanda illərlə davam edən müharibəsi ilə bu qarşıdurma arasında müəyyən oxşarlıqlar var:

“Oxşarlıq ondan ibarətdir ki, hər iki halda böyük güc uzunmüddətli müharibəyə cəlb olunub və nəticədə həm iqtisadi, həm də siyasi itkilərlə üzləşib. Fərq isə bundadır ki, Rusiya bu dəfə yalnız Ukrayna ilə deyil, həm də Qərbin geniş hərbi-siyasi dəstəyi ilə qarşı-qarşıyadır. Bu, müharibəni daha da mürəkkəbləşdirir”.

Züriyə Qarayeva əlavə edib ki, Trampın şübhələri həm də ABŞ siyasəti ilə bağlıdır:

“O, açıq şəkildə bildirir ki, Vaşinqtonun maliyyə və hərbi yükü artıq getdikcə artır və bu, Amerikanın daxili gündəliyinə mənfi təsir göstərir. Lakin Avropa dövlətləri hələlik geri çəkilmək niyyətində görünmür”.

Ekspertin fikrincə, tərəflər real güzəştlərə getmədiyi halda müharibənin illərlə davam etməsi və regionun yeni “donmuş münaqişə” zonasına çevrilməsi istisna edilmir.

 

Firuzə Əliyeva
Sfera.az