Texnologiya nəhəngi "Apple", "WWDC26" tədbirində nümayiş etdirdiyi "Apple Intelligence" bazalı yeni nəsil "Siri" süni intellekt köməkçisinin Avropa İttifaqı (Aİ) ölkələrində istifadəyə verilməyəcəyini rəsmən açıqlayıb.

Sfera.az bildirir ki, şirkət "iOS 27" və "iPadOS 27" əməliyyat sistemləri ilə birlikdə gələcək süni intellekt dəstəkli yeni "Siri"nin Aİ məkanında aktiv edilməyəcəyini elan edib. "Apple" bu radikal qərarın arxasında Avropa İttifaqının Rəqəmsal Bazarlar Aktı (DMA) çərçivəsində tətbiq etdiyi sərt tənzimləmələrin dayandığını qeyd edib.

Şirkətin istifadəçi məxfiliyini qorumaq və digər virtual köməkçiləri dəstəkləmək məqsədilə təqdim etdiyi həll təklifləri requlyatorlar tərəfindən qəbul edilməyib. "Apple"ın Proqram Təminatı Mühəndisliyi üzrə böyük vitse-prezidenti Kreyq Federiqi (Craig Federighi) gələcəkdə bu texnologiyanın regiona gətirilməsi üçün danışıqların davam etdiriləcəyini vurğulayıb. Lakin mövcud hüquqi şərtlər daxilində təkmilləşdirilmiş "Siri AI" sisteminin Avropa ölkələrindəki "iPhone" və "iPad" cihazlarına nə vaxt gələcəyinə dair hər hansı bir dəqiq təqvim yoxdur.

Hansı funksiyalar məhdudlaşdırılır?

Qərara əsasən, Avropa İttifaqındakı "Apple" istifadəçiləri aşağıdakı mühüm yeniliklərdən məhrum olacaqlar: Keçmiş danışıqları göstərən yeni xüsusi proqram; Genişləndirilmiş "Visual Intelligence" (Vizual İntellekt) təcrübəsi; İnteqrasiya olunmuş mətn yazma alətləri; Kamera tətbiqinə əlavə edilən "Siri" rejimi və digər yeni süni intellekt imkanları. Yaşanan bu böyük məhdudiyyət qərarı yalnız "iPhone" və "iPad" platformalarına şamil olunacaq. Avropa İttifaqındakı texnologiya həvəskarları "macOS 27", "visionOS 27" və "watchOS 27" əməliyyat sistemləri vasitəsilə "Siri AI" funksiyalarından problemsiz şəkildə istifadə edə biləcəklər.

Bəsti Rəfizadə

Sfera.az

"Apple"dan istifadəçilərə pis xəbər: Bu, əlçatan olmayacaq