Uşaq yayda dərs oxusun ya dincəlsin? - AÇIQLAMA

Bəzi valideynlər yay tətili müddətində uşaqlarını əlavə məşğələlərə göndərir və daha çox çalışmasını tələb edirlər. Onların fikrincə, dərsdən tam uzaqlaşsa, yenidən məktəbə adaptasiyası çətin olacaq.

Bəzi valideynlərin fikrincə isə yayda uşaqlar istirahət etməli, zehnlərini dinclətməlidirlər. Bu fikir ayrılığı valideynləri iki yerə bölür.

Bəs bu necə tənzimlənməlidir? Uşaqlar yay tətilində dərslə məşğul olmalıdır, yoxsa istirahət etməlidir?

Mövzu ilə bağlı Sfera.az-a açıqlama verən təhsil eksperti Elmin Nuri bildirib ki, bu məsələdə ən doğru yol ortaq məxrəcə gəlməkdir. Ekspert hər iki yanaşma ilə qəti razı olmadığını vurğulayıb:

“Valideynin uşağı yay tətilində çox yükləməsi də yanlış addımdır, həmçinin, övladını ümumiyyətlə, başlı-başına buraxması da ciddi səhvdir. Bunların zərərvericilik dərəcəsi eynidir. Birində dərslərin başlandığı zaman şagirddə izafi yüklənmə, digərində isə adaptasiya problemi yaranır və hər ikisini aradan qaldırmaq xüsusən də azyaşlılarda xeyli vaxt aparır”.

Mütəxəssis həll yollarından danışıb:

“Əsas məsələ burada dəqiq və peşəkar tənzimlənmənin aparılmasıdır. Süni intellekt əsrində, İT texnologiyalarının bu qədər yayğın, əlçatan olduğu bir dövrdə hər valideynin məhz bu məsələ ilə bağlı saysız modellər, həll yolları əldə etmək şansları var. Əmin ola bilərsiniz ki, övladının uzun yay tətilində həm düzgün istirahəti, həm də düzgün hazırlıq proqramının tərtib edilməsi üçün valideynə ən uzağı bir neçə saat lazım ola bilər.

Məsələn, valideyn yay tətilində azyaşlının həm zehni formada qalması, həm də düzgün istirahətinin balanslı şəkildə saxlanılması üçün xarici mənbələrdən konkret təkliflər planı ala bilər. İndiki dövrdə bunun süni intellekt alətlərindən də soruşa və onların yaratdıqları məzmunları müqayisələndirərək öz övladı üçün ən uyğununu seçə bilər. Çünki bütün təkliflər və məzmunlar öz yerində, amma hər bir uşağı ən yaxşı tanıyan şəxs onun valideynidir. “O, nə vaxt yorulur, nə zaman sıxılır?”, “Onu nə daha çox zehni məşqlərdən saxlaya bilər?” kimi sualları övladı üçün ən yaxşı şəkildə yalnız valideyn cavablaya bilər”.

E.Nuri sonda qeyd edib ki, standart qaydalar, modellər də nəzərə alınmaqla, valideyn öz uşağının xarakterinə uyğun şəkildə hazırlıq planı tərtib etməlidir. Bu hazırlıq planı gündəlik 2 saatdan çox olmamalı, akademik təlqin yerinə, oyun əsaslı öyrənməyə və zəka məşqlərinə əsaslanmalıdır.

Firuzə Əliyeva

Sfera.az