Ümumtəhsil məktəblərində daha çox oğlanlar təhsil alır

"Ümumtəhsil məktəblərində təhsil alan şagirdlər arasında oğlanlar 6,6% fərqlə sayca üstünlük təşkil edir".

Sfera.az xəbər verir ki, bunu Milli Məclisin bu gün keçirilən plenar iclasında Ailə, Qadın və Uşaq Problemləri üzrə Dövlət Komitəsinin sədri Bahar Muradova Gender bərabərliyinin təmin edilməsinə nəzarəti həyata keçirən icra hakimiyyəti orqanının 2024-cü ildə fəaliyyəti haqqında məlumatın təqdimatı zamanı deyib.

Qeyd edib ki, peşə təhsili alanların 64%-i kişilərdir. Orta ixtisas təhsili üzrə isə qadınlar 64% nisbətlə üstünlük təşkil edir.  

Ali təhsilin bakalavr pilləsindən danışan sədr nəzərə çatdırıb ki, qadınlar 53%, magistratura pilləsində isə kişilər 54% təşkil etməklə, təhsilalanların cins nisbətində cüzi fərq müşahidə olunur.  

Onu da vurğulayıb ki, 2021-ci ildən uğurla həyata keçirilən "Qızların təhsilinə dəstək" layihəsi çərçivəsində 360 nəfər ayda 200 manat məbləğində "Hənifə Məlikova adına təqaüd proqramı"ndan faydalanır.  

"Bu təşəbbüs bütün ehtiyacları tam qarşılamasa da, təhsil alanlara, təhsil verənlərə və bütövlükdə cəmiyyətə ötürdüyü mühüm mesaj baxımından əhəmiyyətlidir.

Layihə həmçinin təhsil və xeyriyyəçilik fəaliyyətlərinin əlaqələndirilməsinə, tarixi ənənələrimizin gələcək nəsillərə ötürülməsinə mühüm töhfə verir".

Firuzə Əliyeva
Sfera.az