Dünən keçirilən qəbul imtahanında 7 nəfərdə mobil telefon, 2 nəfərdə isə “ağıllı” saat aşkarlandığı üçün imtahandan xaric olunub. Bundan əlavə, başqasının yerinə imtahana gəlmə halı da aşkar edilib.

Qeyd edək ki, qayda pozuntularına yol verənlərin müsabiqə nəticələri ləğv olunur və onlar qəbul imtahanının ikinci cəhdinə də buraxılmırlar.

Maraqlıdır, abituriyentlər nəticəsini bilə-bilə niyə qayda pozmağa yönəlirlər? Qayda pozanlara sonradan güzəşt tətbiq oluna bilərmi?

Mövzu ilə bağlı Sfera.az-a açıqlama verən təhsil eksperti Ramin Nurəliyev bildirib ki, bu kimi hallar hər il baş verir.

Onun sözlərinə görə, bu qayda pozuntusunu törədən tələbələrin əksəriyyəti az bal toplayacağını düşünür:

“Bəziləri illərdir ki, müəllimlə hazırlaşır, amma sınaq imtahanlarında pis nəticə toplayır. Düşünür ki, onsuz yaxşı nəticə əldə edə bilməyəcək. Eləsi var ki, tutulmasa , yüksək nəticə əldə edə biləcəyini düşünür. Bəziləri də ağılsızlıqdan bu addımları atır. Lakin abituriyentlər qaydalara əməl etməlidir. Onlar bilməlidir ki, imtahana girişdə DİM tərəfindən operativ yoxlama həyata keçirilir. Abituriyent bütün bunları bilərək yenə də qayda pozmağa çalışırsa, deməli planlanmış işdir”.

Ekspert qayda pozan abituriyentlərin ikinci cəhdə buraxılmamasından narazılığını dilə gətirib. Ekspert bu şəxslərlə bağlı müəyyən güzəştlərin tətbiq eilə biləcəyini diqqətə çatdırıb:

“Təbii ki, biz bu qaydaları pozanlara qətiyyən bəraət qazandırmırıq. Bu, düzgün deyil, digər abituriyentlətin haqqına girilir. Elə abituriyentlər var ki, onlar öz əzmkarlığı ilə zəhmət çəkib, illərlə oxuyub, bal toplayıb. Qanunsuz vasitələrlə imtahandan müəyyən nəticə əldə etmək istəyənlər onların rəqibləridir. Qayda pozanlar həmin abituriyentlərin hüquqlarına təcavüz kimi qiymətləndirilə bilər. Hamımız Dövlət İmtahan Mərkəzinin həmin abituriyentlərin imtahanlarının ləğvini alqışlayırıq. Bu addımın qarşısı sərt şəkildə alınmasa, qarşısını almaq çox çətin olacaq. Lakin ikinci cəhdə onların buraxılmaması ilə razılaşmıram. Onlar 17 yaşlı yeniyetmədir. Biz nə qədər bununla bağlı ictimaiyyətə məlumat versək, desək ki, imtahanda bu qaydalara riayət edin, istər-istəməz 40 min iştirakçının arasından 10 nəfər qayda pozuntusu həyata keçirəcək. Bir abituriyent hər hansısa cəhddə səhv edirsə, onsuz da o imtahanın nəticəsi ləğv olunur, amma ondan sonrakı mərhələlərə buraxılmaması onun Azərbaycan universitetlərinə müraciət edə bilməməsi və tələbə olmaması deməkdir. Bu da gəncin gələcək kariyerasına mənfi təsir edə bilər. Bəlkə də birinci səhvindən dərs çıxarıb ikinci cəhddə etməyəcək. Bu səbəbdən onlara ikinci şansı vermək olar. Abituriyent xaricdə təhsilə yönəlməyəcəksə, ali təhsildən yayınmış hesab olunur”.

R.Nurəliyev qeyd edib ki, abituriyent elektron cihazı imtahan otağına keçirə bilirsə, burada DİM-in də məsuliyyətsizliyi var.

Müsahibimiz problemdən çıxış yolunu da təklif edib:

“İş yerlərində və yaxud böyük alış veriş mərkəzlərində istifadə olunan müəyyən elektron cihazları təsbit edən aparatlar var. DİM həmin aparatları imtahan keçirilən inzibati binanın giriş hissəsinə yerləşdirə bilər. Oradan abituriyentlər keçərkən hər hansı bir elektron əşya olduğu təqdirdə təbii ki, təsbit olunub alına və abituriyent elektron cihazı istifadə etmədən birbaşa imtahana buraxıla bilər. Azərbaycanla eyni iqtisadi gücə malik olan ölkələrdə bu imkanlar var. Biz də bunu edə bilərik. Buna təbii ki, müəyyən bir vəsait lazımdır. Amma bu vəsait ödəndikdən sonra illərlə bu aparatlardan Dövlət İmtahan Mərkəzi rahatlıqla istifadə edə biləcək. Hesab edirəm ki, Dövlət İmtahan Mərkəzinin bu aparatları ala bilmə gücü, iqtidarı var. DİM hər qəbul ilində bir blok sınaq imtahanı keçirir. Amma əvvəlki illərdə DİM ildə 7-8 sınaq imtahanı keçirdi. Yenə də sınaq imtahanlarını çoxaldıb ordan gələn vəsaitdən rahatlıqla bu aparatlardan alıb, imtahanın binasının giriş hissəsinə yerləşdirilib, abituriyentlərin imtahana elektron cihazsız girməsini təmin edə bilər”.

Firuzə Əliyeva
Sfera.az

"Bu abituriyentlərə güzəşt edilə bilər" - AÇIQLAMA