Məktəbəqədər və Ümumi Təhsil üzrə Dövlət Agentliyi məktəblərdə telefon və digər ağıllı cihazlardan istifadənin qadağan edildiyini açıqlayıb. Məlumatda bildirilir ki, xüsusi hallar istisna olmaqla ümumtəhsil müəddisələrində dərs prosesi zamanı ağıllı telefonlar, ağıllı saatlar, planşetlər və digər qurğuların istifadəsi tövsiyə edilmir. Ötən tədris ilindən etibarən ölkə üzrə 300-dən çox ümumtəhsil müəssisəsində tətbiq edilən şagird davranış qaydalarının əhatə dairəsinin genişləndirilməsi nəzərdə tutulur.

Bu qərar şagirdlər və valideynləri tərəfindən birmənalı qarşılanmayıb.

Mövzu ilə bağlı Sfera.az-a açıqlama verən təhsil eksperti Kamran Əsədov bildirib ki, məktəblərdə telefon qadağası tətbiq edilməlidir, çünki bu, şagirdlərin tədris prosesinə diqqətini artırmaq və yayındırıcı amilləri minimuma endirmək üçün mühüm addımdır:

Ekspert qeyd edib ki, tədqiqatlar göstərir ki, dərs zamanı telefon istifadəsi şagirdlərin konsentrasiyasını azaldır və onların akademik nəticələrinə mənfi təsir edir:

“Məsələn, İngiltərədə məktəblərdə telefonların qadağan edilməsindən sonra akademik göstəricilərdə 6-8% artım qeydə alınıb. Bu qərar təkcə tədris keyfiyyətini yüksəltməklə kifayətlənmir, həm də sosial şəbəkələrdəki kiberzorakılığın təsirini azalda və şagirdlər arasında ünsiyyəti təşviq edə bilər.Telefonlar dərs vaxtı diqqət yayındırıcı vasitə olmaqla yanaşı, şagirdlər arasında rəqabət və təzyiq hissini də artırır. Onların qadağan edilməsi təhsil mühitini daha bərabər və sağlam edir. Lakin bu qadağa tətbiq edilərkən valideynlərlə şagirdlər arasında təcili ünsiyyət üçün alternativ mexanizmlər nəzərdə tutulmalı, texnologiyanın tədris məqsədilə istifadəsi üçün düzgün metodlar işlənib hazırlanmalıdır”.

K.Əsədovun sözlərinə görə, bu addım texnologiyanın təhsildən tamamilə uzaqlaşdırılması deyil, onun düzgün idarə olunaraq istifadəsi üçün şərait yaratmaq məqsədini daşıyır. Məktəblərdə telefon qadağası təkcə dərs mühitində intizamı bərpa etmək deyil, həm də şagirdlərin daha sağlam psixoloji və akademik inkişafını təmin etmək üçün vacibdir.

Firuzə Əliyeva

Məktəblərdə telefondan istifadənin qadağan edilməsi tədrisə necə təsir edəcək? - AÇIQLAMA