Rəqəmsal tələbə kartlarından necə istifadə olunur? - Tələbələrin DİQQƏTİNƏ
Azərbaycanda rəqəmsal tələbə kartlarının istifadəsinə başlanılıb. Bakı, Sumqayıt, Gəncə, Naxçıvan və Lənkəranda 17 ali təhsil müəssəsi əhatə edilməklə, təxminən 170 min tələbə bu sistemə qoşulacaq.
Vahid tələbə kartının tətbiq olunacağı universitetlər arasında Azərbaycan Dövlət Pedaqoji Universiteti, Azərbaycan Texniki Universiteti, Bakı Mühəndislik Üniversiteti, Sumqayıt Dövlət Universiteti, Azərbaycan Dövlət Neft və Sənaye Universiteti, Türkiyə-Azərbaycan Universiteti , Fransa-Azərbaycan Universiteti, Azərbaycan Memarlıq və İnşaat Universiteti, Bakı Dövlət Universiteti, Bakı Slavyan Universiteti, Azərbaycan Dillər Universiteti var.
Qeyd edək ki, digər dövlət və özəl universitetlər könüllü şəkildə layihəyə qoşula bilərlər.
Maraqlıdır, rəqəmsal tələbə kartlarından necə istifadə olunur?
Mövzu ilə bağlı Sfera.az-a açıqlama verən Azərbaycan İnternet Forumunun prezidenti Osman Gündüz bildirib ki, universitetlər İRİA və ETN datası əsasında yeni dəyərlər formalaşdırırlar: Onun sözlərinə görə, artıq bu data əsasında universitet tələbələri üçün rəqəmsal tələbə kartları yaradılıb:
“Yəni tələbələr SİMA imza ilə “mygov” tətbiqinə daxil olmaqla, burada tələbə məlumatlarının əks olunduğu “tələbə kartı”nı əldə edirlər. Bu məlumatlar ETN-nin “mygov”a inteqrasiya olunan tələbə datası əsasında real vaxtda formalaşır. Bununla da tələbələr alternativ olaraq, fiziki formada tələbə kartı olmadan da tələbə məlumatlarını lazım olan yerlərə təqdim edə bilirlər. Ümumiyyətlə, tələbələr, vətəndaşlar tələbə biletini, şəxsiyyət vəsiqəsini və s sənədləri bölüşmək üçün “mygov” mobil tətbiqində “Paylaş" düyməsindən istifadə edirlər. Bu zaman ekranda QR kod və 8 simvoldan ibarət (hərf, rəqəm qarışığı) sənəd nömrəsi əks olunur”.
O.Gündüz qeyd edib ki, İRİA bu məlumatların yoxlanılması üçün də rəqəmsal həll yaradıb: “Qurumlar “mygov Checker” platforması vasitəsilə sənədlərin doğruluğunu yoxlaya bilərlər. Hansısa qurumda sənədlərin yoxlanılması üçün qurum rəhbəri checker.e-gov.az portalına daxil olub əməliyyatları icra edəcək əməkdaşlarına müvafiq səlahiyyətlər verməlidir. Səlahiyyətli şəxs “mygov Checker” tətbiqində “QR skan et” düyməsilə QR kodu skan edə və ya həmin sənəd nömrəsi ilə identifikasiya edə bilər. Təqdim olunan məlumatların yoxlama tarixçəsi myGov mobil tətbiqində “Paylaşdığım məlumatlarım” bölməsində əks olunur. Eyni zamanda, yoxlayan qurumlar da tələbənin, vətəndaşın kim tərəfindən yoxlanıldığını görə bilir”.
Onun sözlərinə görə, artıq bu proses AzTU-da pilot qaydada tətbiq edilir: “10 mindən çox AzTU tələbəsi "myGov" platformasını öz telefonlarına yükləyib. Yəni anlaşıqlı desək, artıq 10 mindən çox AzTU tələbəsi rəqəmsal tələbə kartına, rəqəmsal şəxsiyyət vəsiqəsinə və digər rəqəmsal sənədlərə sahib olub. İRİA və ETN ilə əməkdaşlıq çərçivəsində bu istiqamətdə xeyli işlər görülüb. Universitet rəhbərliyinin tapşırığı əsasında tələbələrin identifikasiyası üçün məsul olan şəxslər İRİA sistemində qeydiyyatdan keçiblər. İRİA-nın dəstəyi ilə universitetin mühafizə xidmətinin əməkdaşları üçün təlimlər də təşkil edilib. Təlim zamanı səlahiyyətli şəxslərə rəqəmsal tələbə kartının məlumatlarının oxunması üçün, tələbələrin identifikasiyası üçün mövcud qaydalar izah edilib”.
AİF prezidenti sonda vurğulayıb ki, dövlətə məxsus datalardan effektiv istifadə etməklə, yeni dəyərlərin yaradılması yetərincə əhəmiyyətlidir: “Bu, ölkədə rəqəmsal transformasiya proseslərinin sürətlənməsinə təkan verir. Digər universitetlər də tələbələrə “mygov” tətbiqi yüklətməklə və İRİA-nın rəqəmsal platformasında qeydiyyatdan keçməklə bu rəqəmsal xidmətlərdən faydalana bilərlər. Və bu, çox doğru olardı. Xidmətlərin hamısı pulsuzdur”.
Firuzə Əliyeva
Sfera.az
