Sertifikatlaşdırma prosesində iştirak edən müəllimlər nəyə diqqət etməlidir? - Ekspertdən MƏSLƏHƏT
Rəsmi qaydada açıqlanmasa da, iddia olunur ki, növbəti il kimya, fizika, biologiya, tarix, coğrafiya, informatika və texnologiya fənn müəllimləri sertifikatlaşdırma prosesindən keçəcək.
Bəs görəsən, həmin fənn müəllimləri daha çox nəyə diqqət etməlidirlər? Bu prosesə necə hazırlaşmalıdırlar?
Mövzu ilə bağlı Sfera.az-a açıqlama verən təhsil eksperti Elmin Nuri bildirib ki, sertifikasiya imtahanında sualların səviyyəsi bəsitdir:
"Sertifikatlaşdırılma prosesində iştirak edən müəllimlərin bir çoxu, eləcə də təhsil mütəxəssisləri orada təqdim olunan sualların rahatlığını hər zaman qeyd ediblər. Şəxsən özümüz bir neçə dəfə Elm və Təhsil Nazirliyinin dəvəti ilə müəllimlərin sertifikatlaşdırılması prosesinin test imtahanı mərhələsini canlı izləmiş və orada müəllimlərin böyük əksəriyyətinin suallarla bağlı məmnunluğunun şahidi olmuşuq. Əvvəlcə ibtidai sinif müəllimləri ilə başlayan bu proses, sonradan Azərbaycan dili və ədəbiyyat, riyaziyyat, xarici dil və s. müəllimlərini də əhatə etdi. Ümumilikdə isə sertifikatlaşdırmadan kəsilən, yəni minimal 30 balı toplaya bilməyənlərin sayı ümumi iştirakçı nisbəti ilə müqayisədə çox cüzi faiz təşkil edir. Haqlı olaraq sertifikatlaşdırmadan keçə bilməyən və hətta ikinci dəfə bu şansdan yararlanmayanlar misal göstərilə bilər. Amma nəzərə alaq ki, onların hazırlıq göstəriciləri çox zəif, hətta elementar suallara belə cavab verə bilməyəcək qədərində idi.Təhsil İnstitutu bir neçə ay bundan öncə sertifikasiyada müəllimlərə təqdim olunan sualları ictimaiyyətə açıqlayanda hər birimiz sualların böyük əksəriyyətinin necə bəsit olduğunu gördük".
Ekspert qeyd edib ki, müəllimlər imtahana görə narahat olmamalıdır:
"2025-ci ildə keçiriləcək sertifikatlaşdırmada hansı fənlərin proqramda olacağından asılı olmayaraq, müəllimlərin narahatlığının əsassızlığını qeyd etməliyik. Çünki tam təsdiqlənməsə də qeyri-rəsmi bilgilərə əsasən, gələn il kimya, fizika, biologiya, tarix, coğrafiya, informatika və texnologiya fənn müəllimləri sertifikatlaşdırma prosesindən keçəcək. Bu fənləri tədris edən müəllimlər də digərləri kimi sualların asan salınacağından tam əmin ola bilərlər. Çünki 2021-ci ildən start götürən sertifikasiya hələ də özünün ilkin periodunu yaşayır. Bu period bütün fənlər üzrə bütün müəllimlərin sertifikasiyada iştirakı bitəndən sonra 2026-cı ildə tamamlanacaq. Birinci periodda biz heç bir fənn üzrə çətinlik dərəcəsi ağır olan sualları onsuz da görməyəcəyik"
O vurğulayıb ki, müəllimlər ilk növbədə özlərini psixoloji cəhətdən hazır hesab etməlidir:
"Bir çoxlarının texnoloji alətlərlə işləmək və test vərdişlərinə adət etmək bacarığı çox zəifdir. Bu xüsusən də orta və yaşlı nəsil müəllimlərdə nəzərə çarpır. Bu tipli müəllimlər onları qarşıda gözləyən sertifikasiyaya hazırlaşmaq üçün psixoloji cəhətdən özlərini tam ələ almalı, müəyyən məşqlər etməlidirlər. Bu məşqlər onların testlə işləmək vərdişlərinə də müsbət təsir edəcək.İnandırıcı görünməyə bilər, amma həqiqətən də bir çox müəllimlərin imtahanlarda psixoloji hazırlığı çatmır. Orta və yaşlı nəsil testlə iş vərdişləri, kompüter üzərindən imtahanın verilməsi bacarıqlarından müəyyən qədər uzaqdadırlar. ARTİ məhz bu cür müəllimlər üçün sertifikasiyadan əvvəl xüsusi təlim və seminarlar təşkil etməli, onları bu istiqamətlərdə də hazırlamalıdır".
Firuzə Əliyeva
