"Məktəblərə istilik 15 noyabrdan tez verilməlidir" - Ekspertdən etiraz

Məlum olduğu kimi, ölkə üzrə mərkəzi istiliyin verilməsi hər il noyabrın 15-də başlayıb aprel ayının 15-də sona çatır. Bakıda və digər iri şəhərlərdə xeyli sayda çoxmənzilli yaşayış binası mərkəzləşdirilmiş qaydada qızdırılır. "Azəristiliktəchizat" yalnız mənzilləri deyil, uşaq bağçalarını, məktəbləri və xəstəxanaları da mərkəzi istiliklə təmin edir. Ümumilikdə respublika üzrə 3800-dən çox yaşayış binası, 400-dən çox təhsil müəssisəsi, 150-dən çox səhiyyə, 2200-dən çox sosial və təsərrüfat obyekti mərkəzi istilik sistemi təchizatına bağlıdır. Digər tərəfdən, iqlim dəyişikliyi nəticəsində havalar artıq daha tez soyuyur. Mənzillərin və fərdi evlərin isidilməsi üçün müxtəlif mənbələrdən istifadə edilsə də, təhsil müəssisələri sadəcə noyabrın 15-ni gözləməli olur. Belə olan halda əhali arasında ciddi narazılıqlar yaranır.

Mövzu ilə bağlı Sfera.az-a açıqlama verən təhsil eksperti Kamran Əsədov bildirib ki, şagirdlərin sağlamlığı üçün istilik qaydaları yenilənməlidir:

“Hazırda məktəblərdə istiliyin verilməsi üçün 15 noyabr tarixinin gözlənilməsi, mövcud hava şəraiti və sağlamlıq tələbləri ilə uyğun gəlmir. 1969-cu ildə qəbul olunmuş bu qayda artıq öz dövrünü tamamlayıb və müasir iqlim dəyişikliklərini nəzərə almır. Artıq soyuq havalar daha erkən başlayır, bu isə xüsusilə uşaqların sağlamlığı üçün ciddi risklər yaradır”.

Ekspert qeyd edib ki, belə bir şəraitdə davam edən dərslər təhsil hüququnun pozulmasına səbəb olur:

“Bu məsələyə təhsil hüququ aspektindən yanaşdıqda, hər bir şagirdin təhlükəsiz və sağlam təhsil mühitinə sahib olması təməl bir hüquqdur. Soyuq siniflərdə təhsil alan uşaqların həm sağlamlığına, həm də öyrənmə prosesinə ziyan dəyir. İstiliyin verilmə tarixinin hər il hava şəraitinə əsasən müəyyənləşdirilməsi daha səmərəli olar. Bu dəyişiklik tələbələrin sağlamlığını qorumaq və təhsil hüquqlarını təmin etmək üçün vacibdir. Qaydaların dövrə uyğun yenilənməsi, şagirdlərin təhsil şəraitini yaxşılaşdıracaq və onların təhsil mühitini daha təhlükəsiz edəcəkdir”.

Firuzə Əliyeva