Məlum olduğu kimi, ikinci imtahana da qatılmalarına baxamyaraq, kifayət qədər bal toplaya bilmədiyi üçün 733 nəfər ibtidai sinif müəlliminin müqavilələrinə xitam verilib.

Xatırladaq ki, (MİQ) üzrə müsabiqənin test imtahanı mərhələsində 47 min 586 namizəd iştirak edib. Eyni zamanda, vakansiya üçün 10 minə yaxın yer təklif olunmuşdu. Müsahibə mərhələsinə 5660 namizəd dəvət olunub və onlardan sadəcə 4300 nəfəri uğur qazanıb. Beləliklə, 30 mindən çox müəllim işlə təmin oluna bilməyib.

Maraqlıdır, ali təhsilli müəllim öz ixtisas imtahanından keçə bilmirsə, ona həmin ixtisas üzrə diplom vermiş ali məktəbə necə güvənmək olar? Bəlkə sərt qaydalar elə ali məktəblərdən başlamalıdır? İnkişaf etmiş ölkələrdə bu proses necə tənzimlənir?

Sabiq deputat Sona Əliyeva Sfera.az-a açıqlamasında bildirib ki, ali təhsil müəssisələrində müəllim yetişidirlməsinə çox ciddi baxılmalıdır:

““Elm və Təhsil Nazirliyi özünün verdiyi diploma niyə inanmır, onu sınağa çəkir?” sualı cəmiyyəti maarqlandıran məsələlərdəndir. Dünyanın bir çox yerində müəllimlər imtahan verirlər, işlə təmin olunmaq üçün sertifikasiya və bu kimi proseslərdən keçirlər. Eyni zamanda, dünyanın bir çox yeridə də universitetlər Təhsil Nazirliyinə tabe deyil. Məsələn, Türkiyədə ali təshil müəssisələri “Yüksek Öğrenim Kurulum”una tabedir və universitetlərin keyfiyyət dərəcəsini də elə YÖK ölçür.  Ümumiyyətlə, dünyada bir qurumun işini özünün yoxlaması elə də yayılmış bir hal deyil. Düşünürəm ki, Elm və Təhsil Nazirliyi də bu məsələnin fərqindədir, bu barədə bir addım atılacaq.

Düşünürəm ki, müəllimlik ixtisası üzrə plan yerləri azaldılmalıdır. Bu gün əmək bazarında 60 mindən yuxarı diplomlu müəllim işsizdir, iş axtarır. Bundan o nəticəyə gəlirik ki, əmək bazarında müəllimlərin sayı tələb olunandan çoxdur. Əslində tələb təklifi üstələməlidirsə, burada tərsinədir”.

Pedoqoq günümüzdə müəllim olmağın çətinliklərini də nəzərə çatdırıb:

“Düşünürəm ki, indi müəllim olmaq həddindən artıq çətindir. İndi müəllimlər həddindən artıq çox imtahanlara çəkilir, işləyir, yorulurlar. İndiki sistem müəllimləri bir qədər istismar edir. Əvvəl müəllimlər bu qədər çalışmırdı, amma daha yaxşı nəticələr ortaya qoya bilirdi. Məsələn, biz özümüz o dövrün şagirdləriyik, o vaxt müəllimlər bu qədər yoxlanılmırdı, imtahan vermirdi, nəzarət olunmurdu. Nəticədə, bizim dövrdə təhsil alan insanlar indikilərdən daha savadlı və dünyagörüşlüdürlər. 

Bu baxımdan düşünürəm ki, bu sistemdə fərqli yanaşma ortaya qoymaq lazımdır. Bununla belə hansısa Avropa ölkəsinin təcrübəsini kor-koranə Azərbaycanın təhsil sisteminə tətbiq etmək də doğru seçim olmazdı. Çünki hər bir cəmiyyətin özünəməxsus mental, psixoloji, sosial xüsusiyyətləri var. Bütün bunlar nəzərə alınmadan təhsil sistemini qurmaq və ya yenləmək mümkün deyil. Azərbaycan təhsil sisteminin yenidən formalaşmasına, köklü dəyişikliklərə, daha çevik olmasına ehtiyac var”.

Sonda S.Əliyeva sertifikasiyadan keçə bilməyib əmək müqavilələrinə xitam verilən həmin 733 müəllimin işlə təmin olunmasınının vacibliyini vurğulayıb.

“Ümumiyyətlə, 733 nəfər müəllimin ikinci cəhd sertifikasiya imtahanından bal toplaya bilməyərək, işlərinə xitam verilməsi cəmiyyətdə böyük rezonans doğurub. Cənab nazir Emin Əmrullayev də bildirdi ki, təhsildə güzəşti vətənə xəyanət hesab edir. Bu təbii ki, belədir. Nəinki güzəşt, təhsildə rüşvət alınması, bununla da müəyyən məsələlərin həll olunması Azərbaycana olan böyük xəyanətdir. Təhsil millətin dayağıdır, cəmiyyətin formalaşmasının əsas ünsürüdür, iqtisadiyyatın çiçəklənməsinin əsasıdır. Bu baxımdan ləyaqətli inanların təhsil sistemində çalışmasının tərəfdarıyam. Bir baxımdan da, bu müəllimlərlə bağlı qərar verilməmişdən əvvəl təbii ki, onların yenidən hazırlıq məsələsinə baxılmalı idi. Onların imtahandan kəsilmə səbəbləri araşdırılmalı idi. Çünki insanlar müxtəlif səbəblərdən imtahandan kəsiliblər. Burada şəxsi problemlər, sağlamlıq məsələləri ola bilər.

İstərdim ki, həmin o 733 müəllim işlə təmin olunsun. Çünki onlar hələ də müqəddəs peşə olan müəllim adını daşıyırlar. Onların bu şəkildə işsiz qalmalarına tərəfdar deyiləm. onlar da ailə sahbidir, hər halda işə ehtiyacları olduğu qənaətindəyəm. Güman edirəm ki, bu məsələlərə də baxılacaq”.

Firuzə Əliyeva