“Tələbə krediti bərabər imkanların yaradılmasında yeni mərhələdir” – ŞƏRH

 

Sfera.az bildirir ki, artıq noyabrın 25-dən təhsil tələbə krediti üçün müraciətlərin qəbuluna başlanılıb. Bununla bağlı saytımıza açıqlama verən təhsil eksperti Nadir İsrafilov qeyd edib ki, təhsil tələbə krediti hamıya bərabər imkanların yaradılmasında yeni mərhələdir:

"Bildiyiniz kimi, ölkə başçısı tərəfindən imzalanmış 17 İyun 2021-ci il tarixli  fərmana əsasən, Fondun fəaliyyətinin təşkili ilə bağlı xərcləri dövlət büdcəsinin vəsaiti və qanunla qadağan olunmayan digər mənbələr hesabına maliyyələşdirilir. Bununla bağlı Azərbaycan Respublikasının Nazirlər Kabinetinə Azərbaycan Respublikasının 2021-ci il dövlət büdcəsində nəzərdə tutulmuş vəsait hesabına Fondun ilkin nizamnamə kapitalının formalaşdırılmasını təmin etmək, Fondun vəsaiti hesabına təhsil tələbə kreditlərinin verilməsi qaydasını bir ay müddətində təsdiq edib, bu fərmandan irəli gələn digər məsələləri həll etmək tapşırılmışdı. Bu fərmanın mətnindən göründüyü kimi, əsas məqsəd təhsilin keyfiyyətini, əhatəliliyini təmin etmək, o cümlədən də sosial baxımdan həssas əhali qrupuna aid edilən ailələrin üzvləri olan gənclərə ali təhsil almaq imkanını yaratmaqdır. Artıq təhsil tələbə krediti üçün müraciətlərin qəbuluna başlanılıb. 

 

Nazirlər Kabineti tərəfindən təsdiqlənmiş müvafiq qaydaya əsasən, təhsil tələbə kreditinin sosial və standart növlərinin mövcudluğundan göründüyü kimi tələbə kreditləri ali təhsilin əhatəliliyini və əlçatanlığını artırmaqla bərabər, rəqabətliliyin də gücləndirilməsinə hədəflənib. Sosial təhsil tələbə kreditindən yalnız sosial həssas təbəqəyə aid ailələrin üzvü olan tələbələr istifadə edə biləcək ki, onlara kreditlər güzəştli şərtlərlə veriləcək. Təhsil tələbə kreditinin ayrılmasında məqsəd ali təhsilin hamı, xüsusilə də əhalinin aztəminatlı təbəqələrindən olan şəxslər üçün əlçatanlığının təmin edilməsi, təhsildə bərabər imkanların yaradılması və ali təhsilin əhatə dairəsinin genişləndirilməsidır. Bu kredit dövlət dəstəyi ilə çox kiçik faizlərlə (sosial kreditlər üzrə illik faiz dərəcəsi 2%, standart kredtilər üzrə isə 6% olaraq müəyyən edilib) və uzun müddətə (təhsil səviyyəsindən asılı olaraq 15-22 il) verilir ki, bu da beynəlxalq təcrübəyə adekvatdır”.

"Bunların da içərisində tələbə təhsil krediti alacaq tələbələr üçün özəl və ya dövlət universitetinin fərqinin olmamasını, təhsil aldığı müddətdə kreditlərdən yararlanan tələbə başqa təhsil müəssisəsinə ödənişli əsaslarla köçürüldükdə, bu zaman da kreditlərdən yararlana bilməsini, bakalavriat pilləsində təhsil kreditindən faydalanan tələbənin məbləği geri qaytarmadan magistratura pilləsinə ödənişli qəbul olursa, o, kreditdən faydalana biləcəyini, təhsilin normativ müddətində, güzəşt və möhlət dövründə kreditə faiz hesablanmamasını və kreditin qaytarılmasının tələb olunmamasını xüsusi qeyd etmək olar. O da təqdir edicidir ki, yuxarı təhsil səviyyəsində əyani təhsil alan, həqiqi hərbi xidmətə gedən, məhkum olan, hamiləliyə, doğuma görə və uşağın 3 yaşı tamam olana qədər ona qulluq etməkdən ötrü ödənişli sosial məzuniyyətdə olduğu müddət və sağlamlıq imkanı məhdud 18 yaşadək uşaqlara və birinci dərəcəli əlilliyi olan şəxslərə möhlət hüququ veriləcək”.

"Bu kimi məsələlərə müraciətlər tam başa çatdıqdan və kreditlərin verilməsinə başlandıqdan sonra aydınlıq gələcək və qaydalarda hansısa təkmilləşmə və yeniləşmə zərurəti yaranacağı da istisna olunmur. Hələ ki, Təhsil Nazirliyinin təhsil tələbə krediti ilə bağlı vətəndaş müraciətlərinin cavablandırılması məqsədilə  təqdim etdiyi xidmətlərdən yararlanmaq olar. Hesab edirəm ki, təhsil tələbə kreditinin tətbiqi ali təhsilin hamı üçün əlçatan olmasının təmin edilməsində təhsildə hamıya bərabər imkanların yaradılmasında yeni mərhələ olmaqla yanaşı, təhsildə rəqabətliliyin artırılmasına və bunun müqabilində təhsilin keyfiyyətinin yüksəldilməsinə də təsirsiz ötüşməyəcək”.