Dövlət borcu artacaq - Rəqəmlər

Maliyyə Nazirliyi “Açıq Büdcə Sorğusu” metodologiyasına uyğun olaraq “2026-cı ilin dövlət və icmal büdcələrinin ilkin göstəricilərinə dair Açıqlama” sənədini dərc edib.

 

Sfera.az xəbər verir ki, sənəddə dövlət borcu ilə bağlı əsas hədəflər açıqlanıb. 

 

Proqnozlara görə, 2025-ci ilin sonunadək dövlət borcunun ÜDM-ə nisbəti 30 faizin altında saxlanılacaq. Xarici dövlət borcunun isə 10 milyard ABŞ dollarını keçməməsi planlaşdırılır.

 

Rəqəmlər göstərir ki, 2025-ci il iyulun 1-nə dövlət borcunun ÜDM-ə nisbəti 19,6 faiz olub. Bu, müəyyən olunmuş yuxarı həddən 10,4 faiz bənd aşağıdır. Beləliklə, hökumət büdcə qaydalarında nəzərdə tutulan məqsədə əməl edir.

 

Nazirliyin açıqlamasına əsasən, 2025-ci ildə Prezident tərəfindən müəyyən edilmiş prioritetlər – nəqliyyat, su təchizatı, məşğulluq və sosial müdafiə sahələrində bir sıra layihələrin maliyyələşdirilməsi üçün beynəlxalq maliyyə institutlarından kredit vəsaitlərinin cəlb olunmasına başlanılıb. Artıq bir sıra kredit müqavilələri təsdiqlənib və yaxın illərdə də xarici maliyyə institutları ilə əməkdaşlığın davam etdirilməsi planlaşdırılır.

 

Proqnozlara əsasən, 2025-ci ilin sonuna dövlət borcunun ümumi məbləği 25,4 milyard manata çatacaq ki, bu da ÜDM-in 19,6 faizi deməkdir. Orta müddətli dövrdə isə dövlət borcunun artacağı gözlənilir: 2029-cu ildə borcun 32 milyard manata yüksələcəyi, amma ÜDM-ə nisbətdə cəmi 19,8 faiz təşkil edəcəyi proqnozlaşdırılır.

 

Beləliklə, açıqlanan rəqəmlər Azərbaycanın dövlət borcunun təhlükəli həddə çatmadığını, əksinə, beynəlxalq maliyyə institutlarından cəlb edilən kreditlərin əsasən iqtisadi və sosial prioritetlərin maliyyələşdirilməsinə yönəldiyini göstərir. Bu isə borc yükünün idarəolunan səviyyədə qalmasına və iqtisadi sabitliyin qorunmasına imkan yaradır.

 

Firuzə Əliyeva
Sfera.az