ABŞ Prezidenti Donald Tramp hakimiyyətdə olduğu dövrdə bir sıra beynəlxalq münaqişələrin həllində mühüm vasitəçilik missiyası yerinə yetirib. Onun rəhbərliyi altında imzalanan sazişlər və diplomatik təşəbbüslər bir çox bölgələrdə uzunmüddətli gərginliklərə son qoyub.

Sfera.az Donald Trampın sülhə vəsilə olduğu gərginlikləri təqdim edir:

Koreya yarımadasında tarixi görüşlər

2018-ci ilin iyununda Donald Tramp və Şimali Koreya lideri Kim Çen In Sinqapurda görüşərək nüvə proqramı və Koreya yarımadasında gərginliyin azaldılması barədə danışıqlar aparıblar. Bu, ABŞ və Şimali Koreya liderləri arasında tarixdə ilk birbaşa görüş olub. Daha sonra 2019-cu ildə Panmuncom sərhəd bölgəsində ikinci tarixi görüş baş tutub.

Yaxın Şərqdə “Abraham Sazişləri”

2020-ci ildə Tramp administrasiyası İsrail ilə bir sıra ərəb ölkələri – Birləşmiş Ərəb Əmirlikləri, Bəhreyn, Sudan və Mərakeş arasında diplomatik münasibətlərin normallaşdırılmasına nail olub. Bu sazişlər regionda illərlə davam edən düşmənçiliyin aradan qaldırılması baxımından tarixi addım kimi qiymətləndirilib.

Balkanlarda iqtisadi dialoq

2020-ci ilin sentyabrında Serbiya və Kosovo liderləri Vaşinqtonda iqtisadi əlaqələrin normallaşdırılması barədə razılıq əldə ediblər. Bu razılaşma tərəflər arasında gərgin münasibətlərin yumşalmasına töhfə verib.

Afrikada Ruanda–Konqo Demokratik Respublikası sülhü

İyun ayında ABŞ vasitəçiliyi ilə Ruanda və Konqo Demokratik Respublikası arasında silahlı toqquşmaların dayandırılması və iqtisadi əməkdaşlıq barədə prinsip razılaşması imzalanıb.

Qafqazda Ermənistan–Azərbaycan razılaşması

Vaşinqtonda keçirilən danışıqlarda Ermənistan və Azərbaycan arasında Zəngəzur dəhlizinin yaradılması və əməkdaşlıqla bağlı sülh deklarasiyası hazırlanıb.

Asiyada Kamboca–Tailand atəşkəsi

Sərhəd gərginliyi yaşayan Kamboca və Tayland ABŞ vasitəçiliyi ilə Malayziyada sülh sazişi imzalayıb. Bu təşəbbüsə görə Kamboca Baş naziri Donald Trampı Nobel Sülh Mükafatına namizəd irəli sürüb.

ABŞ rəhbərliyinin bu diplomatik uğurları Trampı qlobal sülh təşəbbüskarlarından biri kimi ön plana çıxarıb. Bu proseslərin davamlılığı isə tərəflərin razılaşmalara sadiqliyindən asılı olacaq.

Fidan Hacızadə
Sfera.az

Tramp sülhsevər obrazında: Kimləri barışdırıb?