"Paşinyan hücum üçün hazırlıq görür"
Ermənistan Baş naziri Nikol Paşinyan bütün ermənilərin katolikosu II Qareginin vəzifəsindən uzaqlaşdırılması məqsədindən daşınmayıb.
Sfera.az xəbər verir ki, bu barədə “Past” qəzeti məlumat yayıb.
Erməni nəşri xatırladır ki, baş nazir iki həftəyə yaxındır kilsə və katolikos barədə heç bir açıqlama vermir:
“Paşinyanın bu haqda sosial şəbəkədəki son paylaşımı II Qareginin Ali Patriarxlıqdan çıxarılması ilə bağlıdır. Baş nazir bundan əvvəl Eçmiədzində böyük mitinq keçirəcəyini və bütün ermənilərin katolikosunu kafedraldan uzaqlaşdırmaq üçün ora yürüş edəcəyini vəd etmişdi.
Əslində, bu bəyanatdan sonra hakimiyyət hələlik o istiqamətdə heç bir addım atmayıb, amma bu, qətiyyən o demək deyil ki, Paşinyan kilsəyə qarşı siyasətindən geri çəkilib. Hakim “Vətəndaş Müqaviləsi” Partiyasındakı mənbələrimizin dediklərinə görə, onlar bu günlərdə müxtəlif toplantıları davam etdirərək, kilsəyə qarşı kampaniyanı davam etdirmək və buna geniş ictimai dəstək təmin etmək üçün araşdırma aparır, son hücuma hazırlıq görür”.
