"Suriyalılar sülhə layiqdir" - Tom Barrak

ABŞ-nin Suriya üzrə xüsusi nümayəndəsi və Ankaradakı səfiri Tom Barrak Suriyada baş verən son qarşıdurmalarla bağlı açıqlama verib. O, Süveyda və Hələb vilayətinin şimal-şərqində yerləşən Münbiçdə dünən yaşanan toqquşmalara münasibət bildirib.

Sfera.az xəbər verir ki, Barrak “X” sosial şəbəkəsindəki paylaşımında bütün tərəfləri sükunəti qorumağa və münaqişələri dialoq yolu ilə həll etməyə çağırıb.

“Diplomatiya zorakılığı dayandırmağın və davamlı sülh əldə etməyin ən yaxşı yoludur. Suriya sabitliyə, suriyalılar isə sülhə layiqdir”, – deyə ABŞ rəsmisi bildirib.

O əlavə edib ki, ABŞ-nin Süveyda şəhərində həll yolunun tapılmasına vasitəçilik etməsi və Fransa ilə birlikdə ölkənin şimal-şərq bölgələrinin vahid Suriyaya reinteqrasiyasında ortaq rol oynaması qürurvericidir.

Xatırladaq ki, dünən PKK/YPG terror qruplaşması işğal etdiyi ərazilərdən Münbiçin cənub kəndlərinə hücum edib, nəticədə 7 nəfər yaralanıb. Eyni zamanda, Süveyda şəhərində qeyri-qanuni silahlı qrupların atəşkəsi pozaraq daxili təhlükəsizlik qüvvələrinə hücumu nəticəsində 1 təhlükəsizlik əməkdaşı həyatını itirib.

Bəsti Rəfizadə
Sfera.az