ABŞ Prezidenti Donald Tramp artıq Ukraynaya Patriot hava hücumundan müdafiə sistemlərini göndərməyə başlayıb. Bu, münaqişə zonasında müdafiə qabiliyyətini gücləndirmək və Rusiyanın raket hücumlarına qarşı cavabdehliyi gücləndirmək məqsədilə həyata keçirilir.

Ukraynaya nə qədər patriot və ya digər hava hücumundan müdafiə vasitəsi verilərsə, hava məkanının daha etibarlı müdafiəsini təşkil etmək olar?

Bununla bağlı Sfera.az-a açıqlama verən politoloq Züriyə Qarayeva bildirib ki, ABŞ Prezidenti Donald Trampın Ukraynaya Patriot hava hücumundan müdafiə sistemlərinin göndərilməsi barədə qərarı, müharibənin gedişatında strateji dönüş nöqtəsi ola bilər:

“Bu sistemlər Rusiyanın tez-tez həyata keçirdiyi raket və dron hücumlarına qarşı şəhərlərin, enerji infrastrukturlarının və hərbi obyektlərin daha effektiv müdafiəsinə xidmət edir. Lakin yalnız bir neçə batareya ilə Ukraynanın bütün hava məkanını qorumaq mümkün deyil. Patriot sistemləri yüksək dəqiqlik və uzaq mənzilli müdafiə qabiliyyəti ilə tanınsa da, onların sayı və yerləşdirilməsi kritik amillərdir. Effektiv hava qalxanı üçün Ukraynaya azı 8–10 Patriot batareyası, əlavə olaraq NASAMS, IRIS-T və SAMP/T kimi Avropa istehsalı olan qısa və orta mənzilli sistemlər də lazımdır. Hazırda Ukrayna bir neçə sistemlə yalnız prioritet əraziləri – Kiyev, Dnepr, Lvov və digər iri şəhərləri qoruya bilir”.

Politoloq taktiki baxımdan, bu sistemlərin koordinasiyalı şəkildə inteqrasiyası və real vaxtlı radar şəbəkəsi ilə dəstəklənməsinin zəruri olduğunu qeyd edib. O əlavə edib ki, əks halda, müdafiənin boşluqları düşmənə manevr imkanı verir:

“Ukraynanın hava müdafiəsini tam funksional və dayanıqlı hala gətirmək üçün həm sistemlərin sayının artırılması, həm də texniki personalın hazırlığı və texniki xidmət zəncirinin qurulması vacibdir.

Nəticə etibarilə, Patriotların göndərilməsi simvolik deyil, funksional məna daşıyır – lakin bu, yalnız başlanğıcdır. Ukraynanın hava məkanını etibarlı şəkildə qorumaq üçün Qərbin ardıcıl, koordinasiyalı və kəmiyyət baxımından daha geniş miqyaslı dəstəyi vacibdir. Əks halda, Rusiyanın raket və kamikadze dron hücumları qarşısında Ukrayna hələ də risk altında qalacaq”.

Fidan Hacızadə
Sfera.az

Ukrayanaya nə qədər silah lazımdır?