Tramp Azərbaycan-Ermənistan sülhündən danışdı - ABŞ-nin niyyəti nədir?

ABŞ Prezidenti Donald Tramp Azərbaycan-Ermənistan münasibətlərinin normallaşması prosesindən danışıb.

Tramp Ermənistanla Azərbaycan arasında münaqişənin tezliklə uğurla həll olunacağını deyib.

Trampın bu açıqlaması nəyi ehtiva edir? Həqiqətən də tərəflər arasında son görüşdən sonra sülh yaxındırmı?

Sözügedən məsələ ilə bağlı Sfera.az-a açıqlama verən Milli Məclisin deputatı Hikmət Babaoğlu ABŞ Prezidenti Donald Trampın Azərbaycan-Ermənistan münasibətlərində normallaşma prosesinin yüksək qiymətləndirməsi təqdirəlayiq hadisə olduğunu bildirib.

Deputatın sözlərinə görə, heç şübhəsiz ki, ABŞ dünya siyasətini müəyyən edən əsas dövlətlərdən biridir:

“Regionda sülhün təşəkkülü məsələsinin onun siyasi gündəmində yer alması və bu mövzuya diqqət yetirməsi müsbət haldır. Nəticə etibarilə, Azərbaycan da sülh tərəfdarıdır”.

H.Babaoğlu qeyd edib ki, Əbu-Dabidə keçirilmiş son ikitərəfli görüşdən sonra Azərbaycan və Ermənistan, məhz Bakının təşəbbüsü ilə irəli sürülmüş sülh konsepsiyasını müzakirə edərək, sülh yolunda son maneələri aşmağa və yekun razılaşmaya yaxınlaşmağa nail olublar: 

“Görünür, ABŞ Prezidenti də məhz bunu nəzərdə tutaraq ümid etdiyini bildirib ki, Azərbaycanla Ermənistan arasında sülhün əldə olunması bütövlükdə regiona sabitlik və rifah gətirəcək. Bu, həqiqətən də belədir. Bu fikirdə həqiqət var. Çünki hələ müharibə gedərkən belə, Azərbaycan sülhdən danışırdı və müharibədən dərhal sonra ədalətə və beynəlxalq hüquqa əsaslanan sülh konsepsiyasını irəli sürmüşdü. Bu fakt hamıya bəllidir. Təəssüf ki, Ermənistanın bunu qəbul etməsi üçün illərlə vaxt tələb olundu”.

Millət vəkili artıq beş ilə yaxındır ki, bu məsələnin müzakirə olunduğunu və nəhayət, sülhün son akkordlarının vurulmaqda olduğunu əlavə edib. 

Onun fikrincə, Əbu-Dabidə baş tutan görüşdən sonra isə yekun razılaşmanın əldə olunması daha real görünür:

“Ona görə də düşünmək olar ki, nə sülh, nə də müharibə vəziyyəti uzun müddət davam edə bilər. Məncə, Ermənistan da anlayır ki, qarşıdakı bir il ərzində sülhlə bağlı konkret nəticə əldə edilməlidir. Əks təqdirdə, hadisələrin yenidən gərginləşməsi və müxtəlif mərhələlərə keçməsi riski ortaya çıxa bilər ki, bu, nə Ermənistan, nə də Azərbaycan üçün arzuolunandır. Məhz bu səbəbdən sülh razılaşması əldə olunmalıdır”.

Fidan Hacızadə
Sfera.az