İranın nüvə obyektlərinə edilən zərbələr, İsrailin "sərhədsiz" hücum doktrinası və ABŞ-nin müharibəyə daxil olmaq ehtimalı bölgədə yeni toqquşma təhlükəsini artırır. Bu kontekstdə İran daxilindəki regional parçalanma meylləri də diqqət mərkəzinə keçib. Məsələ ondadır ki, istər İraqdakı, istərsə də İrandakı kürd siyasi-hərbi birlikləri İsrailə simpatiya bəsləyən qüvvələr tərəfindən dəstəklənir.

Bəs bu, genişmiqyaslı quru əməliyyatı üçün əsas ola bilərmi?

Mövzu ilə bağlı Sfera.az-a açıqlama verən Milli Məclisin deputatı, siyasi şərhçi Elçin Mirzəbəyli bildirib ki, İsrail uzun illərdir ki, regionda İranın təsirini zəiflətmək üçün qeyri-dövlət aktorları ilə əlaqələr qurur.

Onun sözlərinə görə, İranın şimal-qərbində, xüsusilə də Mahabad, Kirmanşah, Sənəndəc bölgələrində kürd əhalisi, zaman-zaman Tehrana qarşı üsyan meylləri göstərib. Və maraqlıdır ki, İran rejimi də bu kartdan Azərbaycan türklərinin sıxışdırılması məqsədilə istifadə edib. Bu baxımdan, sözügedən bölgələrdə və Güney Azərbaycan ərazilərinin bir hissəsində "Komala", "PEJAK" və digər bu kimi təşkilatlar xarici dəstəklə təxribat fəaliyyətlərini genişləndirə bilərlər.

Millət vəkili qeyd edib ki, İranın quru və dəniz sərhədlərindən quru yolu ilə daxil olmaqla hərbi müdaxilə olduqca riskli və genişmiqyaslı nəticələrə yol aça bilər:

“Bu, yalnız lokal deyil, regional müharibəyə səbəb ola bilər. ABŞ və İsrailin indiki mərhələdə bu cür əməliyyata başlaması ehtimalı azdır, Çünki İran ərazisi kifayət qədər genişdir, ordu və təhlükəsizlik qüvvələrinin sayı çoxdur və kənardan müdaxilə daxildəki müqavimət hissini daha da gücləndirə bilər. Lakin lokal səviyyədə, məsələn, İranın kürd bölgələrində silahlı qarşıdurmaların alovlandırılması, diversiya və terror aktlarının təşkili daha real bir ssenaridir”.

Siyasi şərhçi nəzərə çatdırıb ki, İran daxilində baş verən destabilizasiya rejimin Cənubi Azərbaycanda da təzyiqlərini işə salınmasına səbəb ola bilər:

“İrandakı bəzi dairələr kürd-sünni problemindən diqqəti yayındırmaq üçün türkləri hədəfə ala bilərlər. İran daxilindəki kürd bölgələrinin sabitliyi və bu ərazilərin xarici aktorlar tərəfindən istifadə olunması ehtimalı Yaxın Şərqdə təhlükəsizliyin əsas açarlarından biridir. İsrail və ABŞ bu kartdan istifadə etsələr belə, bu addımlar daha çox təzyiq və daxili sabitliyi pozmaq məqsədi daşıyacaq. Quru əməliyyatı ehtimalı hələlik çox zəif görünür”.

Firuzə Əliyeva
Sfera.az

Türklər hədəf alına bilər - "İsrail və ABŞ..."