İsrail PUA-ları İranda xəstəxananı hədəf aldı

İran rəsmiləri İsrailin pilotsuz təyyarələrlə həyata keçirdiyi hücumu kəskin şəkildə qınayıb. 

Sfera.az “Tasnim News” agentliyinə istinadən xəbər verir ki, səhər saatlarında baş verən hücum nəticəsində xəstəxana və ətrafdakı binalar ciddi ziyan görüb. Hadisə bölgəsində xilasetmə əməliyyatları dərhal başladılıb.

Kirmanşah valisi Mənuçöhr Həbibi hücumu “sionist rejim tərəfindən törədilən vəhşi cinayət” adlandıraraq, fövqəladə hallarda fasiləsiz koordinasiyanın vacibliyini qeyd edib. O, əyalətin böhranla mübarizə bölməsinin tam hazırlıq vəziyyətində olduğunu, bütün aidiyyəti qurumlara isə xilasetmə və ictimai təhlükəsizliyin təmin olunması üçün resursların səfərbər edilməsi barədə göstəriş verdiyini bildirib.

Hücum nəticəsində xəstəxananın müxtəlif bölmələrinə ciddi ziyan dəyib. Hadisədən dərhal sonra təcili tibbi yardım briqadaları əraziyə göndərilib və hazırda xilasetmə işləri davam etdirilir.

Rəsmi məlumatlara görə, hələlik ölən və ya yaralananların sayı açıqlanmayıb, lakin yerli mənbələr bir neçə şəxsin yaralanmış ola biləcəyini bildirir. Hadisə ilə bağlı araşdırmalar davam edir.

Fidan Hacızadə
Sfera.az