Rusiya Prezidentinin köməkçisi Vladimir Medinskinin Rusiya–Ukrayna müharibəsini Qarabağ münaqişəsi ilə müqayisə etməsi Azərbaycanda kəskin etirazla qarşılanıb.

Sfera.az bildirir ki, Medinski müsahibəsində “Rusiya ilə Ukrayna arasında baş verən müharibə dondurularsa və real sülh əldə olunmasa, bu vəziyyət “nəhəng bir Qarabağ” kimi illərlə davam edə bilər”,- deyə bildirib.

Onun sözlərinə görə, Ukrayna gələcəkdə NATO ilə birgə bu əraziləri geri almağa çalışarsa, bu, nüvə müharibəsinə qədər gedə bilər.

Azərbaycan Xarici İşlər Nazirliyi bu açıqlamaya dərhal cavab verərək bəyan edib ki, Medinskinin söylədikləri tarixi faktların təhrifidir və bu cür yanaşmalar yolverilməzdir.

Rusiya bu cür davranmaqla nəyə nail olmaq istəyir?

Mövcud sualla bağlı Sfera.az-a açıqlama verən politoloq Oqtay Qasımov Rusiya prezidentinin köməkçisi Vladimir Medinskinin Ukraynadakı vəziyyəti Qarabağla müqayisə etməsinin olduqca yanlış və qeyri-obyektiv yanaşma olduğunu deyib.

Onun sözlərinə görə, ilk növbədə, həm Qarabağ, həm də Rusiyanın hazırda işğal etdiyi Ukrayna əraziləri beynəlxalq hüquq və tarixi baxımdan müvafiq ölkələrin ayrılmaz tərkib hissəsidir:

“Rusiya bu gün faktiki olaraq 1990-cı illərdə Ermənistanın Azərbaycana qarşı həyata keçirdiyi işğal siyasətinin bənzərini davam etdirir. Medinskinin belə bir paralel aparmaqda məqsədi, əslində, keçmişdə Rusiya tərəfindən Ermənistana verilən dəstəyin üzərini ört-basdır etmək cəhdidir”.

Politoloq o dövrdə Rusiyanın Azərbaycan ərazilərinin Ermənistanın nəzarətində qalması üçün müxtəlif siyasi planlar qurduğunu qeyd edib.

O bildirib ki, bu məqsədlə “Kazan prinsipləri”, “Lavrov planı” kimi təşəbbüslər irəli sürülmüşdü:

“Həmin sənədlərdə əsas ideya işğal olunmuş 5 rayonun Azərbaycana qaytarılması müqabilində, Dağlıq Qarabağla birlikdə Laçın və Kəlbəcərin Ermənistanın nəzarətində saxlanılması və həmin ərazilərə Azərbaycan ordusunun daxil olmasının qadağan olunması idi. Yəni bu planlar Azərbaycan ərazi bütövlüyünü bərpa etmədən münaqişəni dondurmağa yönəlmişdi. Azərbaycan o zaman bu təklifləri qəbul etmədi. Ermənistan isə maksimum tələblərlə çıxış edərək işğal etdiyi torpaqları daimi nəzarətində saxlamağa və beynəlxalq miqyasda leqallaşdırmağa çalışırdı”.

O. Qasımov bu gün Rusiyanın eyni ssenarini Ukraynada tətbiq etməyə cəhd etdiyini diqtə edib:

“Lakin zaman göstərdi ki, Azərbaycan bu işğalla heç zaman barışmadı, milli gücünü toparlayaraq ərazi bütövlüyünü və suverenliyini tam şəkildə bərpa etdi. Bu, digər işğala məruz qalan ölkələr, xüsusilə də Ukrayna üçün mühüm nümunədir. Rusiya isə məhz bu presedentdən ehtiyatlanır. Çünki Azərbaycan-Ermənistan münaqişəsində baş verənlərə bənzər şəkildə Ukrayna da zamanla güc toplayaraq öz torpaqlarını geri qaytara bilər”.

Müsahibimiz həmçinin vurğulayıb ki, digər tərəfdən, Medinskinin bu iki vəziyyəti eyniləşdirməsi Rusiyanın hələ də Azərbaycanın ərazi bütövlüyünü tam şəkildə tanımaqda səmimi olmadığını göstərir:

“Biz bunun bir neçə dəfə şahidi olmuşuq. Rusiya rəhbərliyi, o cümlədən prezident Putin dəfələrlə Nikol Paşinyanın 2022-ci ildə Qarabağı Azərbaycanın tərkib hissəsi kimi tanımasına təəccüb etdiklərini açıq şəkildə bəyan etmişlər. Bu da olduqca diqqətçəkən bir məqamdır”.

Fidan Hacızadə
Sfera.az

"Azərbaycana qarşı olan bu ifadə nə deməkdir?" - "Lavrov planı" və...