Millət vəkili, Azərbaycan Respublikasının Prezidenti yanında Dövlət İdarəçilik Akademiyasının Siyasi Araşdırmalar İnstitutunun direktoru və Yeni Azərbaycan Partiyası Təftiş komissiyasının üzvü Elman Nəsirov Sfera.az-a müsahibə verib.

Materialı təqdim edirik:

-Sizə "bəy", yoxsa "müəllim" şəklində müraciət edək?

- Keçmişdə “bəy” sözünü hər adama demirdilər. Bunun üçün həmin adamın bəylik statusu olmalıydı. Bəzən hamıya müəllim deyirlər. Bu da düzgün yanaşma deyil. Kişi cinsinə qarşı müraciət forması kimi "bəy", qadın cinsinə isə "xanım" sözü qəbul olunub. Mən isə bəy deyiləm, müəlliməm. Mən həm həqiqi, həm də məcazi mənada müəllim xitabına uyğunam. Bakı Dövlət Universitetində müəllim olmuşam, hazırda isə Dövlət İdarəçilik Akademiyasında bu fəaliyyətlə məşğulam, Siyasi Araşdırmalar İnstitutunun direktoruyam, siyasi elmlər doktoru, professor və beynəlxalq münasibətlər kafedrasında da dərs deyirəm, 10-a yaxın doktorantım var, onların işinə rəhbərlik edirəm.

“Həmin insan səninlə üzbəüz danışsa, həmin fikri söyləməz”

- “Sosial şəbəkələr haqqında” qanun layihəsinin hazırlanmasını təklif etmişdiniz. Hazırda hansı dəyişikliyə ehtiyac var?

-Prinsipcə, sosial şəbəkələrin mövcudluğunun lehinəyəm. Hesab edirəm ki, sosial şəbəkələr demokratiyanın bir elementidir. Burada hər bir şəxs öz fikrini ifadə edə bilir. Azərbaycanda insanların təxminən 80 faizi sosial şəbəkə istifadəçisidir. Bu, çox mühüm rəqəmdir. Bu platformalardan sırf ünsiyyət vasitəsi kimi, fikir mübadiləsi etmək üçün istifadə edənlər var. Məsələn, bir yerdə yanğın varsa, bu barədə rəsmi məlumat yayılana kimi artıq kimsə videosunu çəkir və paylaşır, bu da ümumi işə xeyirdir. Bir də sosial şəbəkələrdə işi-gücü ancaq şər-böhtan atmaq olanlar var. Onlar təhqir edir, insanların işgüzar nüfuzuna xələl yetirməyə çalışır ki, bu da Cinayət Məcəlləsində hüquqi məsuliyyət yaradır.

Həmin insan səninlə üzbəüz danışsa, həmin fikri söyləməz. Düşünər ki, məni polisə verər, lakin sosial şəbəkənin cəngəllik qanunları ilə idarə olunduğunu düşünürlər, nə istəsələr, söyləyə bilərlər. Bunun əleyhinəyəm. Hesab edirəm ki, bir çox ölkənin bu sahədəki təcrübəsindən istifadə etmək olar. Uzağa getmirəm, Türkiyədə belə bir təcrübə var. Biz o təcrübədən məqbul variant kimi istifadə edə bilərik. Bir çox kəskin cəza növləri tətbiq oluna bilər. Bu baxımdan, sosial şəbəkənin məhdudlaşdırılması yox, qanunazidd insanların cəzalandırılması tərəfdarıyam. Bütün fəaliyyətlər qanun çərçivəsində olmalıdır.

“Həmin xanımda jurnalist görkəmi yox idi, aşpaza oxşayırdı”

-Reklam, sosial şəbəkələrdə aktivlik nə qədər önəmlidir?

-Reklam çox önəmlidir. Akademiyada 80 dəqiqə mühazirə deyirdim sonra səhəri iki-üç dəqiqə efirdə çıxışım olurdu. Tələbələrim gəlib televiziyadakı çıxışımı tərif edirdilər. Mən bir vaxtlar qəzetlərin birində bir xanım jurnalistin yazılarını izləyirdim, çox əla qələmi var idi. Bir dəfə tədbirdə mənə xanımlardan birini göstərib tanıyıb-tanımadığımı soruşdular. Cavabında, “Yox, kimdir ki?” dedim. Dedilər ki, bəs daimi yazılarını oxuduğun qızdır. Həmin xanımda qətiyyən jurnalist, qələm əhli görkəmi yox idi. Ona baxan aşpaza və s. oxşadardı, amma beyni çox yaxşı işləyirdi. Yəni qızı yox, imzanı tanıyırdım. Reklam bu yerdə önəmlidir.

“Elə danışmaram ki, məni söysünlər”

-Millət vəkili Aqil Abbas demişdi ki, sosial şəbəkələrdə ən çox söyülən deputadır. Sizdə vəziyyət necədir?

- Mən heç vaxt elə ifadə işlətmirəm ki, kimsə məni söysün. Sosial şəbəkələrdə daha çox fikirlərim təhrif olunur. Kimsə fikrimi bəyənmirsə, kontr-arqument qoya bilər. Buna savadı çatmayan isə təhqirə əl atır. Öz hesabı ilə yazan da var, saxta profillərdən istifadə edən də. Bu zaman mən o şəxsi məhkəməyə verə bilərəm. Lakin mən çox da məhkəməyə verilməsinin tərəfdarı deyiləm. Belə olan halda, həmin şəxsin adı mənim adımla hallanır, bir növ reklam olunur. Halbuki, həmin şəxs cəmiyyətdə heç kimdir, nə təhsili, nə intellekti var. Bizi tənqid edən şəxslərin ad və soyadını öz qohumlarından başqa heç kim tanımır. O insanların təhqiramiz 2 cümlə yazısında 12 dənə səhv olur. Digər tərəfdən isə həbs olunanda da deyəcəklər ki, siyasi məhbusdur, deputat onun tutulmasına nail oldu. Bu səbəblərdən həmin şəxslərin məhkəməyə verilməsini üstün tutmuruq.

“Artıq qulaqlarımın pərdəsi ağrıyır…”

-Tənqiddən söz düşmüşkən, bir dəfə demişdiniz ki, məni tənqid edənlər yatan vaxtı idmanla məşğul oluram. İndi necə?

- Üzgüçülüklə məşğul oluram, bəzən işlərim çox olanda fasilə verməli oluram. İdman etməyəndə bu qədər işin öhdəsindən gəlməyə fiziki gücüm çatmır. Təsəvvür edin, gün ərzində 10 tədbir dəvəti alıram, bir o qədər də mətbuata müsahibə verirəm, hər müsahibəni 15 dəqiqədən hesablasaq, 150 dəqiqə telefon qulağımda olur, artıq qulaqlarımın pərdəsi ağrıyır. Bu səbəbdən idmana layiq olduğumu düşünürəm. Formada qalmaq üçün lazımdır. Oğlum da məndən həvəslənir, 12 yaşı var, ciu-citsu idman növü ilə məşğul olur. Fevral ayında İtaliyada keçirilən çempionatda italyana qalib gələrək birinci yeri tutdu. Respublika çempionatında isə gümüş medal qazandı. Dedim ki, özümüzünkünə uduzmaq olar, lakin italyanı İtaliyada məğlub etmək daha şərəflidir.

-Hansısa xüsusi qida rejiminiz varmı?

-Xüsusi qida rejimim yoxdur. Əsas odur ki, çox yeməyə meyilli deyiləm. Bəzi insanlar axşam hansısa restorana gedir, yağlı yeməklər yeyir. Sonradan da kökəlirlər. Elə həyat tərzi iş fəaliyyətinə də təsir edir. Axşam vaxtı çox yeyəndə adamın yuxusu gəlir. Mən əsasən böyük və əhəmiyyətli hesab etdiyim yazılarımı gecə 2-dən səhər 5-ə qədər yazıram. Bütün şəhər yatır, önümdə çay, aradabir maşın səsi gəlir.

-Yəni bütün yazılarınızı özünüz yazırsınız, yazdırmırsınız?

-Mən heç köməkçilərimin yazdığı yazıları bəyənmirəm. Söhbət analitikadan gedir. Mən Azərbaycanın ən gənc - 39 yaşında siyasi elmlər üzrə professoru olmuşam. Peşəkar elmdən gəlmişəm. Mənim yazımı kim yaza bilər ki? BDU-da 75 nəfərdən yeganə universitetə təyinat alan mən olmuşam. Mən universitetdə oxuyan zaman müəllimlə davam dərs üstündə olub. Həmişə dərs danışanda tez qane olub növbəti suala keçməyimi istəyirdilər. Mən də əziyyət çəkdiyim, hazırlaşdığım üçün hamısını danışmaq istəyirdim. Beləliklə, BDU-nu bitirdim, orada təyinat aldım, namizədlik dissertasiyası, doktorluq müdafiə etdim və nəhayət professor adını qazandım. Mənim köməkçilərim bakalavr və ya magistr təhsilli olub. Təsəvvür edin ki, professor magistrın yazdığını özü üçün əsas götürsün. Qətiyyən. Hələ ömrümdə bir dəfə belə şey olmayıb. Parlamentdə heç vaxt önümdə kağız olmayıb, həmişə özüm bədahətən danışmışam.

“Onlara da dedim ki, Azər Badamov sizin dostunuzdur mən isə…”

-Bu yaxınlarda həmkarınız Azər Badamovla birgə səyahət zamanı o, Rusiyaya buraxılmadı. Açığı bu məsələdə sizi də tənqid edənlər oldu. Bildirildi ki, bu qərar fonunda siz də geri qayıtmalı idiniz. Bu məsələyə münasibətiniz necədir?

- 8 milyard insan varsa, 8 milyard da fikir olacaq. O hadisələri mənim qədər bilən ikinci şəxs yoxdur çünki Azər Badamov ilə mən yanaşı idim. Bizim nə məqsəd üçün hara getdiyimiz önəmlidir. Biz gediriksə, bizim məqsədimiz sadəcə səfər deyil. Həştərxanda Heydər Əliyevin 102-ci ildönümü üçün təşkil olunmuş tədbirə gedirdik. Bu tədbirə 1 aydan çox hazırlıq gedib. Orada ağacəkmə kampaniyası, Heydər Əliyev adına məktəbdə görüşlər, qubernator ilə görüş kimi planlar vardı. Bizim üzləşdiyimiz problemi yüksək vəzifəli şəxslərə çatdırma potensialımız vardı. İctimaiyyətlə birlikdə Ulu Öndərin heykəlinin qarşısına gül qoyulmalı idi. Televiziyalara müsahibələr planlanmışdı. Bu fonda A.Badamovla bağlı məsələ çıxdı. Onu müdafiə ilə bağlı bir cümlə dedim orada. Onlar bildirdi ki, ola bilsin, texniki problemdir və sair, gedək, araşdıraq. Mən də dedim ki, A.Badamov Azərbaycan-Rusiya dostluq qrupunun üzvüdür, dövlət dumasında bizi təmsil edən şəxslərdən biridir, yəni sizin dostunuzdur, mən isə Azərbaycan-Avropa İttifaqı parlamentlərarası əlaqələr komitəsinin üzvüyəm, Aİ də sizin düşməninizdir, məntiqlə siz məni saxlmalıydınız, lakin dostunuzu saxladınız. Dedilər ki, qərar onunla bağlıdır. A.Badamovu sona qədər mən özüm müşayiət etdim. Aramızda inciklik yoxdur. O özü də proseduru yaxşı bilir, çox da gözəl insandır. Biz A.Badamovla birlikdə qayıtsaydıq, heç bir nəticə olmayacaqdı. Orada Heydər Əliyevlə bağlı çox böyük təbliğat və təşviqat keçirildi, İlham Əliyevin siyasətinə uyğun olaraq Baş nazir səviyyəsində onları məlumatlandırdıq. Hər kəs öz ağlı səviyyəsində məsələyə qiymət verir. Miqyası görəndə isə ən doğrusunun bizim addımımız olduğu barizdir. Seçim olsa ki, Heydər Əliyevin siyasəti ilə bağlı mühüm tədbirlərdə iştirak yoxsa həmkarınla geri qayıtmaq, ikincisi heç nəyi dəyişməyəcəkdi.

- Sizcə, bu gün Azərbaycanda iqtidarla müxalifət dialoqu hansı mərhələdədir? Ümumiyyətlə, alınırmı?

- Azərbaycan hələ Heydər Əliyevin dövründən demokratik inkişaf yolu seçib. Demokratiya bir prosesdir, burada bir nöqtə yoxdur, Azərbaycan da bu prosesin tərkib hissəsidir. Bu məntiqlə müxalifətlə siyasi dialoqa xüsusi önəm veririk. Yeri gəlmişkən, Prezident Administrasiyasında yaradılmış siyasi partiyalar və parlamentlə əlaqələr işçi şöbəsinin də fəaliyyəti məhz bu istiqamətdə kifayət qədər böyükdür. Müxalifət və iqtidar nümayəndələri arasında çoxlu görüşlər keçirilir. Eyni zamanda, mən də hakim partiyanı təmsil edən şəxs kimi müxalifətlə debatlara gedirəm. O debatlar biz – 2 nəfər və bir jurnalistin iştirakı ilə keçirilir. Çox maraqlı fikir mübadiləsi olur. Bəzən deyirlər ki, onların sözünü eşitmirik. Lakin onlar istənilən fikri səsləndirə bilirlər, ittihamlarının da sayı-hesabı yoxdur.

“Sərdar Cəlaloğlu cığallıq edir, sual verdim cavab olmadı”

-Bəs sizin üçün debatda ən yaxşı və ən pis müxalifətçi kimdir?

-Debat özü bir siyasi mədəniyyətdir. Fikirlər toqquşa da bilir, üst-üstə də düşür. Orada intellektdən əlavə insanın səbri də olmalıdır. Debata çıxan bəzi şəxslərdə bu sarıdan problemlər var. Bəzən özlərinə deyirəm ki, hər debata çıxan qarşısındakının zəif nöqtəsini axtarır. Kimin zəif nöqtəsi nədirsə, oraya təzyiq göstərilir. Onlara deyirəm ki, mən heç vaxt sizə qarşı bu taktikadan istifadə etmərəm. Siz mənsiz də elə özünüzdən çıxırsınız, təmkinli deyilsiniz. Mən də bir çox hallarda bundan istifadə edirəm. Bu baxımdan REAL partiyasının sədri Natiq Cəfərli ilə debatlarımız çox yaxşı alınır. Hər ikimiz rəqəmlərlə işləməyi, faktlara söykənməyi xoşlayırıq. Sərdar Cəlaloğlu ilə isə bizim debatımız çox bərbad vəziyyətdə olur. Bu da yəqin ki, onun xarakteri ilə bağlı məsələdir. Həddindən artıq emosionaldır. Özündən böyük və kiçik hər kəsə “sən” deyə müraciət edir. Polemikaya dözümü yoxdur. Qarşısında kontur-arqumentlər qoyanda cığallıq etməyə başlayır. Debatların birində o dedi ki, Amerikaya getmişəm. Mən də dedim ki, sizə qulaq asırlar, Amerika qitənin adıdır, siz ABŞ-yə getmisiz. Bu sözlə özündən çıxdı. Dedi ki, konqresə gedib. Soruşdum ki, nə qədər konqresmen var? Cavab verə bilmədi. Soruşdu ki, bunun nə mənası var? Mən də bildirdim ki, məndən soruşsalar ki, Azərbaycan Respublikasının Milli Məclisində neçə millət vəkili var, mən 125 cavabını verməliyəm. Cavabı tapa bilmədi. Köməklik etdim ki, 50 ştat var, hər ştatdan da 2 senator var. Onda hesabladı ki, say 100-dür. Sonra başlayır qışqırmağa. Debatda belə şeylər olmaz. Danışıq zamanı qeydlər aparılmalı və kontur-arqumentlər faktlara əsaslanmalıdır. Bu da bir çoxlarında yoxdur.

“O gündə olduğunuz üçün elə 1 il hakimiyyətdə qala bildiniz”

-Dediniz ki, hər debata çıxan qarşısındakının zəif nöqtəsini axtarır. Siz qarşınızdakıların zəif nöqtəsini bilirsinizmi?

- Mən təzyiqə başlayıram. Debatda qarşımdakının zəif hesab etdiyim nöqtələrinə toxunuram. Məsələn, müxalifət münayəndəsidirsə, 1992-1993-cü ildə hakimiyyətdə olublar, həmin 1 il müddəti ilə bağlı nəsə deyəndə özlərindən çıxırlar. O zaman da deyirəm ki, siz niyə 1 ildən çox hakimiyyətdə qala bilmədiniz? İndi 65 yaşında belə hövsələsizsənsə, 30-lu yaşlarında vəzifə tutanda, gör, necə olmusan. O gündə olduğunuz üçün elə 1 il hakimiyyətdə qala bildiniz. Bu sözlərdən sonra yenidən əsbiləşirlər. Bu da mənim texnikamdır. Eyni taktikanı mənə kimsə edəndə gülümsəyirəm. Əgər məqsəd məni hövsələdən çıxarmaqdırsa, təmamilə mənasız, boş işlə məşğuldurlar. Məni özümdən çıxarıb, mənə çıxılmaz suallar verib, siyasi səhvlər buraxmağa vadar etmək istəyənlərə deyim ki, bu, qeyri-mümkündür.

“Biz dünyamızı dəyişəndə qadınların çiynindəmi aparacaqlar?”

-Seçilərinizlə tez tez görüşürsüz? Ən çox problemlər hansı istiqamətdədir?

- Ayda minimum 2 dəfə seçicilərimlə görüşürəm və bu görüşlərin nəticələri də olur. Onların dediklərini mən parlamentdə səsləndirirəm və müvafiq icra hakimiyyəti orqanları ilə danışıram. Xüsusən də, hökumətin parlament hesabatı olanda unikal şans yaranır. Qaldırdığım məsələlər sayəsində Cəliləbadın İranla sərhədində 36.2 kilometr, yəni 20 yaşayış kəndinin asfaltlaşması, 16 kəndin ən müasir avadanlıqlarla kabelləşməsi həyata keçirilib. İndi isə kabellə bağlı 21 kəndi siyahıya salmışıq. “Azərişıq” ASC-nin rəhbəri Vüqar Əhmədov bu məsələdə bizə çox köməklik göstərir. İnsanlar inanır ki, deputat məsələni qaldıranda öz həllini tapır. Orada əsas problemlərdən biri mavi qazla təminatdır. O insanlara biz ünsiyyət zamanı həmişə bu məsələni qaldırırlar. Azəriqaz İB-nin o vaxtkı rəhbəri Ruslan Əliyevlə danışıqlarımız nəticəsində 5 kəndin daxili imkanları hesabına qazlaşması həyata keçirildi. Azəriqaz İB-nin fəaliyyəti ilə bağlı parlamentdə tənqidi çıxışım olmuşdu. Demişdim ki, necə olur, qonşu Biləsuvarda qazlaşma 100 faiz, amma Cəlilabadda 50-60 faizdir. Biz bundan sonra görüşdük və məsələ həllini tapdı. Hazırda həmin kəndlər boşalır. Hətta sonuncu dəfə İranla sərhəd kənddə seçicilərlə görüşüm olanda bir məsələ qaldırıldı. Bu mənim heç ağlıma gəlməzdi. Dedilər ki, meşələr qırılıb, qazımız da olmasa, gənclər qalmır burada. Yaşlı insanlar deyir ki, görmüşük ki, tabut kişilərin çiynində aparılır. Bizi ən çox narahat edən məsələ odur ki, biz dünyamızı dəyişəndə qadınların çiynindəmi aparacaqlar? Bizim ağır problemlərimizdən biri budur. Elə etmək lazımdır ki, gənclər kəndləri tərk etməsin. Cəlilabadın bir kəndi var ki, orada 200 nəfərlik müasir məktəb mövcuddur. Təəssüf ki, hazırda həmin məktəbdə 50 şagird qalıb. Buna uyğun olaraq da müəllimlər ixtisar olunub. Bu proses qorxulu tendensiyadır. Bu məsələni parlamentdə də qaldırmışam. İranla sərhəddə kəndlərin boşalması sadəcə iqtisadi məsələ deyil, bu çox ciddi siyasi məsələdir. Bu səbəbdən də həmin 20 kəndin qazlaşması baş verdi. Bir körpünü düzəltdik. Əsas məsələlərdən biri də Cəlilabadda qızların ali məktəbə qəbul olmasıdır.

“Bəzən baş aldatmaq istəyirlər”

-Cənub zonasında erkən nikah problemini də tez-tez eşidirik

-Əvvəllər Cəlilabaddan qızların gəlib ali təhsil almasında ciddi boşluqlar vardı. İndi bu sahədə ciddi irəliləyiş var. Çox istərdik ki, bu məsələ həmişə gündəmdə qalsın. Erkən nikahlarla bağlı vəziyyət əvvəl daha bərbad idi, mübarizə, məlumatlandırma və polisin səyi nəticəsində bu məsələ xeyli zəiflədilib. Bəzən şahid oluruq ki, 16 yaşında qızı ərə veriblər. Araşdırırıq, deyirlər ki, gedib yaxın qohumugilə gəzməyə gedib, onlar da buraxmır k, 3-4 ay bizdə qal. Bu şəkildə baş aldatmaq istəyirlər.

“Bəziləri parlamentdə çox danışır, o deputata ciddi yanaşmırlar”

-Elman müəllim, sanki hər plenar iclasda eyni millət vəkilləri danışır, bəzi həmkarlarınız tamamilə səssizdir. Sizin də son dönəmlər parlamentdə səsinizi çox eşidə bilmirik. Səbəb nədir?

-Parlamentdə çox danışanlardanam. Lakin bəziləri bir iclasda 4-5 dəfə danışır. Bu kəmiyyətdir, keyfiyyət deyil. Narahat edən, strateji mahiyyətli məsələ varsa, bir dəfə çıxış edirsən, bəsdir. Hər məsələ ilə bağlı söz alıb danışanda sanki fon yaradırsan ki, fəalsan. Fəallıq bu deyil. Elə hər məsələ ilə bağlı fikir ifadə edən deputata ciddi yanaşmırlar. Mənim ixtisasım siyasətdir. Vergi və gömrüklə bağlı məsələnin müzakirəsi zamanı iqtisadçılar sussun, mən danışım, buna qeyri-ciddi baxarlar ki, sahənin adamları qalıb, sən niyə danışırsan? Bunun əleyhinəyəm. Mən onsuz da kifayət qədər KİV-lərə müsahibələr verirəm, görüşlərdə iştirak edirəm. Bəzən yazılanda siyahıya düşməmək də olur. Hökümətin hesabatında, Baş nazir gələndə ilk çıxış məndə idi. Orada bəxtin gətirməyi vacibdir. Bəzən onluğa düşmək olmur, bəzən də birinci olursan. Danışmaq üçün xüsusi icazəyə ehtiyac yoxdur. Sahibə xanım özü də elm adamıdır, ziyalıdır. Heç bir məhdudiyyət yoxdur. Kim sözünü demək istəyirsə, deyir.

-Artıq 10 ildir ki, deputat kimi fəaliyyət göstərirsiniz. Maraqlıdır, Elman Nəsirov üçün parlamentin "maraqlı dövrü" varmı? Və bu nəyə əsasən belədir?

-Əslində parlamentin hansısa dövrünün maraqlı olaraq bölünməsinin tərəfdarı deyiləm. Lakin bu gün parlament diplomatiyası öz inkişafının yeni mərhələsindədir. Sədr Sahibə xanımın çoxsaylı səfərləri olur və bu baxımdan mənim üçün bu, maraqlıdır. İxtisasım beynəlxalq münasibətlər və diplomatiyadır və sədrin bu istiqamətlərdə səfərlərdə, tədbirlərdə iştirakı daha qiymətlidir.

-Sabiq deputatlardan hansının yenidən parlamentdə təmsil olunmasını istərdiniz?

-Siz bəlkə onların mənə siyahsısını verəsiniz.

-Artıq unutmusunuz yəni?

-Hamısını yada sala bilmirəm.

-Məsələn, Çingiz Qənizadə, İqbal Ağazadə…

-Onlardan ikisindən birini seçmək lazım gəlsə, Çingiz Qənizadəni seçərdim.

-Bir müsahibənizdə mühafizəkar olduğunuzu demisiniz. Bu sizə hər hansı formada maneə yaratmır ki?

-Mühafizəkarlıq deyəndə köhnənin müdafiəsini nəzərdə tutmuram. Ruslar demiş “nikbinəm, amma məndə pessimist cərəyan da var”. Nikbinlər təyyarəni icad edirlər, bədbinlər paraşütü. Mən, əslində, yenilikçiliyin də tərəfdarıyam. Lakin bilirəm ki, istənilən yenilik süngü ilə qarşılanır. İctimai fikir onu çox həzm edə bilmir. Vaxtilə Cəlilabadda qaz çəkilişi həyata keçiriləndə əksər insan partlayış qorxusu ilə bundan imtan etmişdi. Sonra həmin insanlar qazın olmamasından şikayətçi oldular. Yol çəkiləndə isə dedilər ki, avtomobillər sürətlə hərəkət edəcək, uşaqlarına görə narahatdırlar. İndi isə dava edirlər ki yolları bərbaddır. Yəni insan xisləti belədir. Dağ kəndlərində əvvəl bu kimi problemlər var idi, indi isə deyirlər intenernet yoxdur. Sonra da intenet çəkiləndə zəif olmasından şikayət edib heç olmamasının daha yaxşı olduğunu bildirirlər. İnternet güclü olanda isə uşaqlarının dərsdən uzaq olduğunu deyirlər. Bu da anlaşılandır əslində. Zaman keçdikcə yeni tələblər, yeni yanaşmalar formalaşır. Bu mənada mən özümə mühafizəkar deməzdim. Mən milli-mənəvi dəyərlərimizin qorunub saxlanılmasında mühafizəkaram. Eyni zamanda müasir texnologiyaların ölkəmizə gəlişi və s. məsələsində realistəm, novator yanaşıram.

“Bu fikrimə görə xanımlar “sağ ol” deməli idilər”

-Amma qadınların avtomobil idarə etməsinə yaxşı baxmadığınızı da bildirmisiniz.

-Bu fikrimi kontekstdən çıxarmışdılar. Həmin fikrimə görə əslində mənə sağ ol deməli idilər ki, mən qadınların halına yanıram, onları dəstəkləyirəm. Belə ki, mən alman ekspertlərinin bu sahədəki tədqiqatı ilə tanış olmuşdum.Onlar 20 il ərzində eksperiment aparıblar və qənaətə gəliblər ki, avtomobili özü sürən xanımların üzlərində sürməyənlərə nisbətdə daha çox qırış var. Çünki maşın sürəndə hər an kiməsə əsəbiləşirsən və mimikalar dəyişir. Beləliklə, qənaətə gəliblər ki, avtomobilin arxasında əyləşib yaşıllığı seyr edən xanımların üzü daha təravətli qalır. Mən də istəyirəm ki, qadınlar həmişə gözəl görünsün, təravətli qalsınlar. Buna görə də maşın sürməkdən imtina etməyə dəyər.

“Deyirlər ki, nə yaxşı ki mən seçilmişəm…”

-Hansı halda mandatdan imtina edərsiniz? Məsələn, yüksək vəzifə təklif olunsa?

-Mandatdan imtina bizim istəyimizlə bağlı deyil. Yəni 50 min insan 10-15 alternativ arasından məni deputat görmək istəyib. Bu mənada mandatdan imtina həm də seçicilərlə razılaşdırılmış halda olmalıdır. Mandatdan məhrumetmənin də qaydaları var. 50 min insanın adı ilə çıxış edən, onların problemlərini işıqlandırmalı olan şəxs o halda mandatdan imtina etməlidir ki, heç bir işlə məşğul olmasın, seçiciləri ilə görüşməsin. Mən problemləri həll etməkdə vasitəçi olduğum kəndlərə gedəndə, insanlarla görüşəndə zövq alıram. Bu mənada ikinci dəfə seçilməyim çox rahat oldu. İnsanlar arasında mənimlə bağlı xoş sözlərin olması da qulağıma çatır. Deyirlər ki, həmin bölgə üzrə nə yaxşı mən seçilmişəm. Vaxt var idi həmin dairədən olan deputat məsafə uzaq olduğuna görə insanlarla görüşə də gəlmirdi.

-O zaman növbəti seçkilərdə də namizəd olacaqsınız?

-Biz partiyanın əsgərləriyik və bu partiyanın rəhbəri ölkə prezidenti İlham Əliyevdir. O, partiyadan 125 nəfərin namizədliyini irəli sürür və bu böyük şərəfdir ki, o namizədlər arasında mən də olmuşam. Mənə prezident tərəfindən hər hansı istiqamət üzrə təklif olarsa bu etimadı yüksək qiymətləndirərəm. Mənə təklif parlamentlə bağlı olub və mən də bu işi sevə-sevə, ləyaqətlə icra etməyə çalışıram.

-Yay tətilini necə keçirməyi düşünürsünüz?

-Mən əvvəllər Ukraynaya gedirdim. Əsasən Qərbi Ukraynaya səfər edirdim və oranın suyu mədə-bağırsağıma çox xeyir edirdi. Sonra müharibə oldu, getmək alınmadı. Bu il Qubada Şahdağa getmək istəyirəm. Belə ümumi bundan əvvəl Qusarda, Şəkidə dincəlmişəm. Bu il fevral ayında İtaliyada idim. Oğlumun məşqçilərinin cibindən 500 avro pul çəkdilər. Brüsseldə də eyni qaydada bizə axşam saatlarında çölə çıxmamağı tövsiyə etmişdilər. Yəni bu mənada təhlükəsizlik Azərbaycanda yüksək səviyyədədir elə burada dincəlmək yaxşıdır.

Firuzə Əliyeva

Əzizə Zeynal

“Artıq qulaqlarımın pərdəsi ağrıyır…” - Elman Nəsirovla MÜSAHİBƏ