Ermənistan danışıqlara razılıq verdi: Bu, İrəvanın siyasətində dönüşdürmü?
Ermənistan uzun tərəddüddən sonra “3+3” formatında keçiriləcək üçüncü regional görüşə razılıq verib. Bu qərar İrəvanın Qərblə deyil, region dövlətləri ilə əməkdaşlığa üstünlük verməyə başladığına dair ehtimalları gündəmə gətirib.
Mövzu ilə bağlı Sfera.az-a açıqlama verən politoloq Oqtay Qasımovun fikrincə, bu, Ermənistanın xarici siyasətində müəyyən korrektələrin baş verdiyindən xəbər verir.
O. Qasımov bildirir ki, “3+3” formatı ilk dəfə 2020-ci ilin dekabrında Azərbaycan və Türkiyə prezidentləri tərəfindən Zəfər paradı zamanı elan edilib. Həmin vaxtdan etibarən, Gürcüstan istisna olmaqla, region ölkələri bu platformada ardıcıl iştirak edirlər. Ermənistan isə ilkin mərhələdə könülsüz olsa da, bu prosesdən tamamilə kənarda qalmayıb:
“Ermənistanın bu formata qoşulması müəyyən qədər Rusiya və İranla münasibətlərini qorumaq məqsədi daşıyır. Xüsusilə İranla əlaqələrə zərər vurmamaq üçün bu görüşlərdə iştirak etməyə üstünlük verir. Bu da onu göstərir ki, Ermənistan tədricən qərbyönümlü siyasətdən regional yanaşmaya keçid etməyə başlayır”.
Politoloq hesab edir ki, bu formatda keçirilən görüşlərin Rusiya üçün əsas məqsədi regionda təsir imkanlarını qoruyub saxlamaqdır. Onun sözlərinə görə, bununla belə, o düşünür ki, görüşün özlüyündə Rusiyanın geosiyasi mövqeyini ciddi şəkildə gücləndirməsi hədəfi daşımır.
“Regionun dörd ölkəsi Azərbaycan, Türkiyə, Rusiya və İran dəfələrlə bəyan ediblər ki, region problemləri region ölkələrinin iştirakı ilə həll olunmalıdır. Bu görüşlərin təşkili də Ermənistan üçün açıq mesajdır: bölgəyə üçüncü qüvvələrin daxil olması istənilmir”, – deyə Qasımov əlavə edib.
Görüşdə sülh sazişi gözlənilirmi?
Ekspert bildirib ki, “3+3” formatında keçirilən görüşlər Ermənistanla Azərbaycan arasında ikitərəfli sülh müqaviləsinin müzakirə olunduğu danışıqlarla eyni məzmun daşımır: "Sülh prosesi ayrıca kanallar vasitəsilə aparılır və bu istiqamətdə artıq mühüm irəliləyişlər əldə olunub. Bu format sülh sazişinin imzalanması üçün nəzərdə tutulmayıb. “3+3” daha çox region ölkələri arasında ümumi əməkdaşlıq və təhlükəsizlik məsələlərinin müzakirə platformasıdır”.
Bəsti Rəfizadə
Sfera.az
