İsrail və Türkiyə Suriyada hərbi əməliyyatların qarşılıqlı koordinasiyası və toqquşmaların qarşısının alınması məqsədilə xüsusi “qaynar xətt”in yaradılması barədə razılığa gəliblər. Bu razılaşma, hər iki ölkənin Suriyada artan hərbi iştirakı fonunda, təsadüfi qarşıdurmaların qarşısını almaq və əməliyyatların təhlükəsizliyini təmin etmək məqsədi daşıyır.

“Qaynar xətt”in yaradılmasında məqsəd nədir? Layihə ölkələr arasında perspektivdə nələrə yol aça bilər?

Mövcud suallarla bağlı Sfera.az-a açıqlama verən politoloq Elman Vəliyev İsrail və Türkiyənin Suriyada koordinasiyanı aktivləşdirməsi və “qaynar xətt”in yaradılmasının artıq tərəflər arasında anlaşmanın mövcud olduğunu bildirib.

Onun sözlərinə görə, Suriyada hər hansı hərbi əməliyyat həyata keçiriləcəyi təqdirdə, qarşı tərəf öncədən məlumatlandırılacaq:

“Əməliyyat zamanı hərbi komandanlıq səviyyəsində Baş Qərargah rəisi və ya təhlükəsizlik strukturlarının rəhbərləri digər tərəfə xəbərdarlıq edəcək. Eyni protokol İsrail üçün də keçərlidir. O da Türkiyə tərəfinə əvvəlcədən məlumat verəcək. Bu əməkdaşlıq Suriyanın gələcəyi baxımından mənfi tendensiya kimi qiymətləndirilə bilər. Çünki İsrail və Türkiyənin bölgədəki maraqları bir-biri ilə ziddiyyət təşkil edir”.

Politoloq bu mexanizmlə tərəflərin Suriyada istədikləri kimi hərəkət etmək üçün bir-birinə mane olmayacaqlarını qeyd edib. O bildirib ki, bu proses həm Türkiyə, həm də İsrail baxımından strateji uğur sayılır:

“Ərdoğan administrasiyası ABŞ və İsrailin Yaxın Şərqdəki maraqlarını təmin edən gizli qüvvə kimi çıxış edir. Ərdoğanın “Böyük Orta Şərq Layihəsinin ilk sədriyik” açıqlaması da bunu təsdiqləyir. Bu layihənin əsas məqsədi bölgədə geosiyasi nüfuzu genişləndirməkdir”.

Fidan Hacızadə
Sfera.az

Türkiyə İsraillə "Qaynar xətt" yaratdı - Nələr gözlənilir?