"Qərb Ukraynanın qalibiyyətini istəmir" - AÇIQLAMA

Rusiya Qərbin bütün hədələrinə baxmayaraq atəşkəsə getmir. Rusiya Qərbin Ukraynaya zaman qazandırmaq üçün atəşkəs istədiyini bildirir.

Maraqlıdır, Rusiyanın Qərbdən çəkinməməsinin səbəbi nədir? Qərbin Rusiyaya təsir imkanları itib?

Mövzu ilə bağlı Sfera.az-a açıqlama verən politoloq Asif Nərimanlı bildirib ki, Rusiyanın Qərbdən çəkinməməsinin bir çox səbəbi var. 

Onun sözlərinə görə, başlıca səbəb müharibə boyunca Rusiyanın Qərbin qarşısında tab gətirə bilməsidir:

“Qərbdə Rusiyaya qarşı siyasi, iqtisadi, hətta mədəni təzyiqlər belə edilirdi. Kollektiv Qərb Ukraynanı dəstəklədi, hətta “muzdlular” adı altında müxtəlif qruplar Ukrayna ərazisindən Rusiyaya qarşı müharibəyə cəhd edirlər. Bu 3 il ərzində Rusiya iqtisadi sanksiyaların qarşısında çıxış yolları tapa bilib, siyasi müstəvidə Çin başda olmaqla, Qərbə qarşı olan ölkələrlə siyasi əlaqələrini möhkəmləndirmək istiqamətində addımlar atdı. Bütün bunlarla yanaşı, müharibə meydanında da çoxsaylı itkilərinə baxmayaraq, geri addım atmadı. Nəticə etibarilə Rusiya qalib olmasa da, Ukraynanın, dolayı yolla Qərbin də qələbəsinə imkan verməyib. Burada əsas səbəblərdən biri Qərb nə qədər Rusiyaya qarşı addım atsa da, heç birinin həlledici olmamasıdır”. 

Politoloq qeyd edib ki, Qərb də Ukraynanın qalib gəlməsini istəmir:

“Müharibə getməsinə baxmayaraq, Avropa Rusiyadan enerji resursları alır çünki Avropa Rusiya qazından asılıdır. Belə ki, müharibə dövründə də 2025-ci ilin əvvəlinə qədər Ukraynadakı qaz daşıyan kəmərə toxunulmadı. Qərb ölkələri Ukraynaya Rusiyanı tam geri oturdacaq silahlar vermədilər. Belə görünür ki, Ukraynaya verilən silahlar Rusiyanı məğlub etmək üçün yox, sadəcə döyüşə bilməsi üçün lazım idi. Avropanın özündə belə kollektiv mövqe sərgilənmirdi. Hazırda isə Rusiya daha güclü çıxış edir. Artıq bütün iqtisadi, siyasi və hərbi təzyiqlərə məruz qalıb, buna qarşı duruş gətirə bilir. Bu gün Qərb kollektiv şəkildə Rusiyaya qarşı çıxış etmir”. 

A.Nərimanlı vurğulayıb ki, Trampın hakimiyyətə gəlməsi Rusiyaya qarşı fikirləri dəyişib:

“Tramp hakimiyyətə gələndən sonra ABŞ Rusiya ilə danışıqlara başlayıb. Bu danışıqlar sadəcə Ukrayna məsələsinə görə deyil, ümumiyyətlə, geosiyasi müstəvidə anlaşma olduğu görünür. Tramp administrasiyası Avropa İttifaqını proseslərdən kənara salmağa çalışır. Kollektiv Qərb artıq parçalanıb. Hazırda Qərb Rusiyaya qarşı daha zəif çıxış edir. Bu da Rusiyanın daha da tələb irəli sürməsinə şərait yaradır Bütün bunlarla yanaşı, Rusiya müharibə meydanında xeyli güclüdür, ABŞ-nin silah verməməsi Ukraynanı zəiflədib. İndiki vəziyyətdə Qərbin təsir imkanları Rusiyada təmamilə itməsə də, zəifləyib. Rusiya da istəyir ki, danışıqlar prosesi ilə məsələ həll edilsin. Tramp administrasiyası Qərbdə Rusiyanın maraqlarına uyğun şərait formalaşdırıb. Bu proses uzanarsa, vəziyyət dəyişə bilər”. 

Firuzə Əliyeva
Sfera.az