Fidan, Rubio və Şeybani bir arada - Nələr danışıldı?
Türkiyənin xarici işlər naziri Hakan Fidan, Suriya xarici işlər naziri Əsəd Həsən Şeybani və ABŞ Dövlət katibi Marko Rubio arasında üçtərəfli görüş baş tutub.
Bu görüş NATO xarici işlər nazirlərinin Antalyada keçirilən qeyri-rəsmi toplantısı çərçivəsində reallaşıb. Bu, ABŞ və Suriya arasında son 15 ildə keçirilən ilk yüksək səviyyəli görüşdür və Vaşinqtonun Dəməşqlə münasibətləri normallaşdırmaq istiqamətində atdığı mühüm addım kimi qiymətləndirilir .
Görüş zamanı əsas hansı məsələlər gündəmə gəlib? Toplantı hazırkı beynəlxalq problemlərin həllində nə kimi rol oynayıb?
Mövcud suallarla bağlı Sfera.az-a açıqlama verən siyasi şərhçi Kənan Novruzov üç ölkənin xarici işlər nazirlərinin görüşünün şübhəsiz ki, Suriya məsələsi ətrafında baş tutduğunu bildirib.
Siyasi şərhçinin sözlərinə görə, tərəflər Suriyada yeni formalaşan hökumətə beynəlxalq ictimaiyyətin münasibətini müzakirə ediblər:
“ABŞ Prezidenti Donald Trampın bu günlərdə Suriyaya qarşı sanksiyaların ləğv ediləcəyini bəyan etməsi və Türkiyənin bu addımı müsbət qarşılaması fonunda, Ankara Vaşinqtonun Suriya siyasətində daha da yumşalma olmasını arzulaya bilər. Hətta Suriyanın yenidən qurulması prosesində Türkiyənin ABŞ-dən iqtisadi və siyasi dəstək gözləməsi də mümkündür”.
Müsahibimiz Suriyada hələ də terrorçu qrupların mövcudluğu faktının qaldığını və bu baxımdan Türkiyənin ABŞ-dən təhlükəsizlik sahəsində əməkdaşlıq gözləntisi olduğunu deyib.
O qeyd edib ki, baxmayaraq, PKK özünü buraxdığını açıqlayıb, hələ də silahlı fəaliyyətini dayandırmayıb:
“Üstəlik, bu qərarın PKK-nın PYD, KCK və YPG kimi qollarına da şamil olunub-olunmaması sual altındadır. Belə əməliyyatların həyata keçirilməsi üçün isə ABŞ-nin razılığı və dəstəyi vacibdir. Ümumilikdə, Suriya məsələsi ətrafında kifayət qədər ciddi və strateji əhəmiyyətli danışıqlar aparılır. Suriya hakimiyyətində baş verən dəyişiklikdən sonra Ankara artıq Dəməşqi yalnız regional güc kimi deyil, həm də beynəlxalq siyasi arenada önəmli aktora çevirməyə çalışır. Bu məqsədlə də ABŞ ilə daha sıx əməkdaşlıq qurmaq və Vaşinqtonun siyasi dəstəyini əldə etmək niyyətindədir. Təbii ki, ABŞ Türkiyəyə müəyyən güzəştlər edəcəksə, Ankara da qarşılığında Amerikanın bölgədəki maraqlarını nəzərə alacaq”.
Fidan Hacızadə
Sfera.az
