"Tramp Çindən mənfəət əldə etməyi düşünür" - AÇIQLAMA
ABŞ Prezidenti Donald Trampın İsveçrədə keçirilən görüşlərdən sonra verdiyi açıqlamalar, 2025-ci ilin may ayında ABŞ və Çin arasında əldə olunan müvəqqəti ticarət atəşkəsi ilə bağlıdır.
Razılaşma çərçivəsində iki ölkə arasında 90 günlük tarif azaldılması və bəzi iqtisadi güzəştlər nəzərdə tutulur. Tramp bu razılaşmanı “tam sıfırlama” adlandıraraq, Çin bazarının Amerika biznesi üçün daha əlçatan olacağına ümid etdiyini bildirib.
Tramp Çinlə əldə olunan razılaşmaların ABŞ biznesinə hansı imkanlar yaradacağını düşünür?
Sfera.az-a bu barədə açıqlama verən siyasi şərhçi Kənan Novruzov ABŞ ilə Çin arasında ciddi və çoxşaxəli iqtisadi müharibə getdiyini deyib. Onun sözlərinə görə, tərəflər müxtəlif sahələrdə — texnologiya, hərbi sənaye, tibb sənayesi və digər strateji sahələrdə bir-birlərinin bazarını zəiflətməyə çalışırlar:
“Bir tərəf yeni məhsul təqdim etdikdə, digər tərəf dərhal buna adekvat cavab verir və oxşar məhsulu daha ucuz qiymətlə bazara çıxarır. Bu isə qlobal iqtisadiyyata, ixrac və idxal proseslərinə mənfi təsir göstərir”.
Müsahibimiz ABŞ Prezidenti Donald Trampın bu proseslərə biznesmen düşüncəsi ilə yanaşdığını qeyd edib.
K.Novruz bildirib ki, Tramp anlayır ki, Çini zəiflətməkdənsə, ondan iqtisadi mənfəət əldə etmək daha məqsədəuyğundur:
“Bu baxımdan Vaşinqton və Pekin dərk edir ki, bu müharibənin qalibi yoxdur və davamlı qarşıdurma hər iki tərəfə zərər vurur. Ona görə də, hər iki ölkə əməkdaşlıqda maraqlıdır. ABŞ əslində, Çini zəiflətməkdən çox, onun geniş və dərin bazar imkanlarını öz xeyrinə istifadə etməyə çalışır. Hazırda Çinlə bağlı aparılan siyasət buna uyğun şəkildə qurulub və bu, ağıllı strateji yanaşma nümunəsidir”.
Fidan Hacızadə
Sfera.az
