Aİ-Türkiyə münasibətləri gərginləşir? - AÇIQLAMA
Avropa İttifaqı İstanbul şəhər bələdiyyəsinin sədri Əkrəm İmamoğlunun həbsindən sonra Türkiyə ilə əməkdaşlığı diqqətlə nəzərdən keçirəcəyini açıqlayıb. Aİ-nin sözçüsü Markus Lammert Türkiyənin Avropa dəyərlərinə sadiq qalmasını istəyib.
Maraqlıdır, bundan sonra onsuz da soyuq olan Aİ-Türkiyə münasibətləri daha da pisləşə bilərmi?
Mövzu ilə bağlı Sfera.az-a açıqlama verən siyasi şərhçi Kənan Novruzov bildirib ki, Aİ İmamoğlu məsələsindən Türkiyəyə qarşı təsir vasitəsi kimi istifadə edə bilər.
Onun sözlərinə görə, son vaxtlar ABŞ ilə Avropa İttifaqı arasında münasibətlər soyuqlaşmaqdadır. Buna görə də ABŞ ilə Türkiyə arasında münasibətlərin inkişafı Aİ-də rəsmi Ankaraya qarşı neqativ mövqeyə səbəb ola bilər. Aİ isə İmamoğlu məsələsindən bəhanə kimi istifadə edə bilər.
K.Novruzovun fikrincə, bütün hallarda, münasibətlər kəskin dərəcədə pisləşməyəcək:
“ABŞ ilə münasibətlərin pisləşməsi və Rusiya-Ukrayna müharibəsi fonunda Türkiyə Aİ-yə lazımdır. Aİ hazırda oyundankənar vəziyyətdədir. Türkiyənin isə Rusiya və Ukrayna ilə normal münasibəti var. Aİ Türkiyənin köməyi ilə proseslərə daxil ola bilər”.
Firuzə Əliyeva
