ABŞ rəsmilərinin İrana mümkün hücumla bağlı bəyanatları haqqında məlumatlar mövcuddur.

Məsələn, ABŞ-nin milli təhlükəsizlik məsələləri üzrə müşaviri Maykl Uolts bildirib ki, Vaşinqton İranın Yəməndəki hədəflərinə hücum etməyi nəzərdən keçirir. O, İranın Yəməndə husilərə verdiyi dəstəyin qarşısını almaq üçün bu addımların atıla biləcəyindən söz açıb.

ABŞ-nin İrana qarşı bu iddiası nə dərəcə realdır?

Bununla bağlı Sfera.az-a açıqlama verən politoloq Yalçın Hacızadə İsrail yarandığı gündən ona ən böyük dəstək verən ölkələrdən birinin Amerika olduğunu bildirib. Onun sözlərinə görə, iki ölkə münasibətləri o qədər inkişaf edib ki, İsrailin təhlükəsizliyinin təmin edilməsi məsələsi ABŞ-də daxili və xarici siyasətdə əsas faktorlardan birinə çevrilib:

“Amerika İsrailə qarşı aqressiyanı və təhdidi özünə qarşı olurmuş kimi qiymətləndirir və reaksiya verir. İranda 1979-cu ildə "molla inqilabından" sonra İsrail - İran münasibətləri kəskin pisləşməyə başladı. Hazırda Yaxın Şərqdə İsrailə ən böyük təhdidi İran və onun yaratdığı proksi qüvvələri törədir. Əlbəttə, İsrailin də genişlənmə və işğal planları buna səbəb olur”.

Politoloq Trampın İranla əlaqədar siyasətindən, xüsusən nüvə razılaşmasından çıxması və İranın nüvə proqramına qarşı sərt mövqeyindən bəhs edib.

Y.Hacızadə 2023-cü il oktyabr ayında Həmas-İsrail müharibəsi başlayandan sonra hər iki ölkənin bir-birinə qarşı raket zərbəsi endirdiyini xatırladıb:

“İsrail bundan istifadə edərək Amerikanın iştirakı ilə İrana qarşı hücumu daha da genişləndirməyə çalışaraq hərbi bazaların və nüvə istehsal obyektlərinin vurulmasına nail olmaq istəyirdi. Lakin Bayden hakimiyyəti buna getmədi. İrana qarşı radikal addımlar atılmasının tərəfdarı olan və birinci prezidentliyi zamanı sələfi Obama dövründə əldə olunmuş "Nüvə razılaşmasından" çıxan Tramp indi təhdidlər yağdırır. Əvvəlcə İran dini liderinə məktub yazaraq hədə-qorxu gəldi. Bir neçə gündür də Yəməndə husilərə hücumlar təşkil edir. Özü də husilərə qarşı başlanılmış savaşın İrana qarşı yönəldiyini açıq-aşkar bildirir. Seçki kampaniyası zamanı İsrailə daha çox dəstək verən ABŞ prezidenti olacağını deyən və hakimiyyətə gələn kimi də bunu həyata keçirən Tramp, Yaxın Şərqdə İsrailin təhlükəsizliyinin təmin olunması üçün İrana qarşı hücumlar da həyata keçirə biləcəyini göstərmək istəyir. Bu həm də Trampa daxili və xarici siyasətini həyata keçirmək üçün yəhudi lobbisidən dəstək almaq üçün də lazımdır”.

Fidan Hacızadə

ABŞ İran hədəflərinə hücum edəcək? - AÇIQLAMA