Ukrayna ABŞ-siz nə qədər tab gətirəcək? - AÇIQLAMA

ABŞ-nin hərbi yardımı olmadan Ukrayna indiki səviyyədə yaya qədər mübarizə apara bilər. 

Sfera.az xəbər verir ki, bu haqda məlumatı “The Wall Street Journal” Pentaqondakı mənbələrə istinadən açıqlayıb. 

Jurnal yazır ki, ABŞ-nin silah yardımı olmasa yay aylarında Ukrayna çətinlikləri hiss etməyə başlayacaq. Bundan sonra Kiyev hava müdafiə sistemləri də daxil olmaqla ən müasir silahlarını itirə bilər. 

Adı açıqlanmayan bir Pentaqon rəsmisi deyib ki, indi Ukrayna hərbi texnika təminatının 55 faizini özü ya istehsal edir, ya da digər ölkələrdən öz pulu ilə alır. Qalan silahların 20 faizi ABŞ-dən, 25 faizi Avropadan çatdırılır. Ukrayna ildə 2,5 milyon ədəd artilleriya və minaatan mərmisi istehsal edir.

Sentyabr ayından etibarən ABŞ 3 milyon ədədə yaxın artilleriya mərmisi göndərib və 2024-cü ildə Avropa Birliyi (AB) artilleriya mərmilərinin istehsalını Ukraynaya görə 1,4 milyon ədədə qədər artırıb. Hazırda silah təchizatında problemi olmayan Ukraynanın yay aylarına qədər ABŞ-nin verdiyi inkişaf etmiş hava hücumları sistemləri, ballistik raketlər, naviqasiya sistemləri və artilleriya qurğularını əvəz etmək imkanı olmayacaq. 

Jurnala danışan hərbi səlahiyyətli qeyd edib ki, Avropa ABŞ-nin verdiyi silah sistemlərini indi lazım olan miqdarda istehsal etmir. Buna görə də ABŞ hərbi yardımları dayandırarsa, Ukrayna qısa müddətdən sonra ciddi çətinliklə üzləşəcək və mövqelərini qorumaq üçün gücünü itirəcək. 

Mütəxəssislər ən böyük problemin rus ballistik raketlərini vura biləcək “Patriot” hava hücumundan müdafiə sistemləri və ATACMMS sistemləri ilə bağlı yaranacağını da bildiriblər. 

Vasif