Aİ-nin "müşahidə" missiyasının avantürist addımları sülh prosesinə əngəl yaradacaqmı? - AÇIQLAMA

Avropa İttifaqının (Aİ) Ermənistandakı müşahidə missiyasının Azərbaycanla şərti sərhəddə avantürist addımları davam edir. Bu dəfə daha bir qrup Qazax rayonu istiqamətinə gəlib. Bununla bağlı görüntülər də yayılıb və buradan aydın olur ki, Ermənistanla Azərbaycan arasındakı şərti sərhədə yerləşdirilən Aİ missiyasının üzvləri durbinlə Azərbaycan ərazilərini müşahidə ediblər. Yəni Aİ sülhə mane olmaq üçün artıq əlindən gələni edir. 

Bu, Azərbaycanla Ermənistan arasındakı duruma və ümumiyyətlə, sülh prosesinə necə təsir edəcək?

Bununla bağlı Sfera.az-a açıqlama verən politoloq Natiq Miri deyib ki, Avropa Birliyinin “müşahidə" missiyasının fəaliyyəti prosesə birbaşa deyil, dolayı yolla təsir edir:

“Çünki sülh, təhlükəsizlik məsələsi iki qonşu dövlətin bilavasitə siyasi iradəsindən asılıdır. Bu, qətiyyətli qərarlar açığı, çox da uzaqda deyil. Hiss olunur ki, artıq müxtəlif səviyyələrdə yaxınlaşmalar mövcuddur. İstər kommunikasiyaların açılması, Zəngəzur dəhlizi məsələsi, istər sərhədlərin müəyyənləşməsi – delimitasiya və demarkasiya prosesi, istərsə də sülh mətnində iki son müddəanın razılaşdırılması – düşünürəm ki, bunlar həll olunacaq şeylərdir. Bu yöndə danışıqlar da gedir. Yəni qapılar, pəncərələr açıqdır. Konkret danışıqlar pəncərəsi mövcuddur və proses, diplomatik ünsiyyət müxtəlif səviyyələrdə gedir. Ona görə də Avropa Birliyi müşahidə missiyasının sərhəddə varlığını təbii ki, Aİ-nin geosiyasi maraqları ilə bərabər, Nikol Paşinyan hökumətinin ən azından növbəti parlamentdə qələbəsinə qədər təhlükəsizlik mexanizmi kimi görmək lazımdır”.

Müsahibimiz bildirdi ki, Paşinyan həm Aİ-nin dəstəyini, həm də özünün təhlükəsizliyini bu illər ərzində təmin etmək istəyir:

“Bunu da bəhanə gətirərək daha çox ermənilərin istədiyi səviyyədə sərhədlərin tezliklə müəyyənləşməsini tələb edir. Bilirsiniz, şərt bundan ibarətdir ki, sərhədlər nə qədər tez delimitasiya və demarkasiya olunarsa, artıq müəyyənləşmiş sərhədlərdə Aİ-nin dırnaqarası müşahidə missiyası durmayacaq. Yəni müşahidə missiyası istəməyən Azərbaycan dolayısı ilə həm də tezliklə demarkasiya prosesini başa çatdırmalıdır. Hər bir halda, düşünürəm ki, bunlar sülh prosesinə ciddi əngəl yaratmır. Münaqişəsinin həlli məsələsinin önü açıqdır. Sadəcə bəzi məsələlər var ki, hələ də erməni ictimai rəyində oturuşmayıb. Bu yöndə Ermənistan daxilində ciddi mübarizənin getdiyi də hiss olunur. Paşinyan öz düşündüklərini ictimai rəyə təlqin edə bildikcə, bu məsələlər də öz həllini tapacaq. Nəhayət, Donald Tramp administrasiyasının Cənubi Qafqazla bağlı xarici siyasət prioritetləri bəlli olandan sonra ola bilsin ki, bu məsələnin həlli daha da sürətlənsin. Hələlik Cənubi Qafqaz siyasəti ilə bağlı qeyri-müəyyənlik mövcuddur, bu baxımdan narahatlıq var. Paşinyanın son ABŞ səfəri də təxminən bu məsələləri öyrənmək və gələcək siyasətini müəyyənləşdirmək xarakteri daşıyır”.

Günay Rəsulqızı