“Ermənistanın Baş naziri Nikol Paşinyan yaxın aylarda istefa verəcək”.

Bu iddia ilə Paşinyanın keçmiş silahdaşı, deputat Ovik Ağazaryan çıxış edib. O, bunu ölkədə növbədənkənar seçkilərin keçirilməsinin planlaşdırılması ilə əlaqələndirib. Ötən ilin sonuna qədər hakim komandada yer alan və yuxarı dairələrdə baş verənlərdən xəbərdar olan Ağazaryan hesab edir ki, cari xarici siyasi hadisələr növbədənkənar seçkilərin hakimiyyətin maraqlarına uyğun olduğu şəraitini yaradır. Onun sözlərinə görə, hazırda Paşinyanın yenidən etimad mandatı alması və öz planlarını irəli aparması üçün daha çox şansı var. “Növbədənkənar seçkilər keçirmək üçün başqa səbəblər də var”,- Ağazaryan təfərrüatları açıqlamadan vurğulayıb.

Bununla bağlı Sfera.az-a açıqlama verən siyasi şərhçi Zeynal Əmrəliyev deyib ki, Ağazaryan “başqa səbəblər” dedikdə məhz xarici amilləri nəzərdə tutub:

“Ancaq bu məsələdən ehtiyat edərək çox danışmayıb. Maraqlıdır ki, elə həmin gün ABŞ və Ermənistan arasında “strateji tərəfdaşlıq” haqqında saziş imzalandı. Bu sazişlə Ermənistan faktiki olaraq ABŞ-nin himayəsi altına keçdiyini bəyan edir. Belə bir anda ölkədə növbədənkənar seçkilər haqqında bəyanatın yayılması isə bir neçə məsələdən qaynaqlana bilər. İlk növbədə, Paşinyan Rusiyaya bağlı müxalifəti zərərsizləşdirmək niyyətindədir. Keçmiş hakimiyyət nümayəndələri, Köçəryan-Sarkisyan komandasını tamamilə sıradan çıxarmaq üçün xalq dəstəyinə ehtiyac duyur. Buna görə də seçkini yeniləmək və xalqdan güc alaraq öz işini həyata keçirmək istəyir. İkinci bir məsələ isə Ermənistanın Qərbə doğru inteqrasiya prosesinə Rusiyanın verəcəyi sərt reaksiya ilə əlaqəlidir. Donald Trampın prezident seçilməsindən sonra Ukraynada müharibənin dayandırılması ehtimalı böyükdür. Bundan sonra Rusiya diqqətini Ermənistan yönəldəcək. Paşinyan bunu yaxşı bilir”.

Ekspert bildirdi ki, ölkə daxilində Rusiyaya bağlı xeyli siyasi qüvvə var:

“Onların fəallaşdırılması və bu qüvvələrdən istifadə edilərək daha mütəşəkkil müxalifət hərəkatı yaradılması da mümkündür. Xüsusilə son zamanlar Rusiyadakı erməni iş adamlarının ictimai fəallığı artırması bu prosesdən xəbər verir. Paşinyan həm də bu vəziyyətin qarşısını almaq üçün seçkini qabağa çəkə bilər. Daha bir məsələ isə erməni Baş nazirin nüfuzunun hazırda yüksək olmasıdır. Rusiya ilə münasibətlərin pozulması fonunda Ermənistan iqdisadiyyatını çətin günlər gözləyir. Tramp komandası artıq xaricə yardımları azaldacağını bəyan edib. Paşinyan hökuməti ehtiyat edir ki, ABŞ-nin ayırdığı maliyyə yardımları Ermənistanda pisləşməkdə olan iqtisadi vəziyyəti dirçələtmək üçün kömək etməsin. Buna görə də erməni hökuməti vəziyyət daha da pisləşənə qədər seçkiləri qabağa çəkmək taktikasına əl ata bilər”.

Z.Əmrəliyev qeyd etdi ki, Ermənistan hökumətində Baş nazirin dəyişdirilməsi məsələsi geniş müzakirə edilir:

“Seçkidən sonra yeni qurulacaq hökumətə rəhbərlik üçün əsas adı çəkilən şəxslər Baş nazirin həyat yoldaşı Anna Akopyan, xarici işlər naziri Ararat Mirzoyan, parlamentin sədri Alen Simonyan və Təhlükəsiz Şurasının katibi Armen Qriqoriyandır. Ancaq Baş nazirdən sonra ən nüfuzlu şəxs olması səbəbindən Ararat Mirzoyanın hökumətə rəhbərlik etmək şansı digərlərindən daha çox görünür. Yeni seçkilər ABŞ-nin nəzarəti altında və şübhəsiz ki, onun maraqlarına uyğun şəkildə təşkil ediləcək. Seçkidən sonra qurulacaq hökumətdə də Vaşinqtona yaxın şəxslərin üstünlük qazanması gözləniləndir”.

Günay Rəsulqızı

Növbədənkənar seçki İDDİASI: Paşinyanı Anna əvəz edəcək? - ŞƏRH