"Bayden administrasiyası "son akkordları"nı vurur, Rusiya razılıq verməsə, ABŞ Ermənistanda..." - ŞƏRH

Xəbər verdiyimiz kimi, artıq ABŞ və Ermənistan strateji tərəfdaşlıq sazişi imzalanıb. Sənədi Ermənistanın xarici işlər naziri Ararat Mirzoyan və ABŞ dövlət katibi Entoni Blinken Vaşinqtonda razılaşdırıblar.

Maraqlıdır, İrəvanın bu addımı regiona hansı formada təsir edəcək? Yaxın gələcəkdə Ermənistanda Rusiyanın hərbi bazası çıxarıla və əvəzinə ABŞ-nin bazası yerləşdirilə bilərmi?

Bununla bağlı Sfera.az-a açıqlama verən Milli Məclisin Müdafiə, təhlükəsizlik və korrupsiya ilə mübarizə komitəsinin sədri Arzu Nağıyev deyib ki, sözügedən sənədinin məzmunu tam şəkildə aydın olmasa da, əsas məqsəd Ermənistanın ABŞ ilə strateji tərəfdaşlığını rəsmiləşdirmək planıdır:

“Yəni bu, tək ABŞ-nin istəyi ilə həyata keçirilmir, eyni zamanda Ermənistanın daxilində də sazişin nələrə gətirib çıxara biləcəyi ciddi müzakirə olunur. Bəzi ekspertlər hesab edir ki, bu sənədin imzalanması Rusiyanın əleyhinədir və ya Bayden administrasiyasının “son akkordları”dır və Tramp komandasına bunu ötürüb getmək məqsədi güdür. Digər tərəfdən, Entoni Blinken sərhədlərin möhkəmlənməsində ekspert yardımı göstərmək üçün Ermənistana bir qrup mütəxəssisin göndəriləcəyini deyir. Məlum məsələdir ki, sərhəddə artıq Avropa Birliyinin vizual kəşfiyyatçıları, silahları var və bunun hansı fəsadlara gətirib çıxarması ilə bağlı biz dəfələrlə fikirlər bildirmişik. Eyni zamanda sülh müqaviləsinin imzalanması üçün əsas şərtlərdən də biri həmin vizual kəşfiyyatçıların iki dövlət arasında gələcəkdə ayırd edilə biləcək delimitasiya, demarkasiya olunmuş sərhədlərdən uzaqlaşdırılmasıdır. Sözügedən sənədə isə Rusiyanın reaksiyasının necə olacağı artıq məlumdur. Çünki KTMT-də guya özünün fəaliyyətini donduran Ermənistan ABŞ ilə belə bir strateji tərəfdaşlıqla bağlı sənəd imzalayır. Bu isə birmənalı şəkildə Rusiyanın regiondan uzaqlaşdırılması məsələsidir”.

Millət vəkili bildirdi ki, Rusiya Ermənistandan çıxan deyil:

“Burada Rusiyanın razılığı olmadan və ya Rusiya birmənalı şəkildə Ermənistanla bütün problemlərini həll etmədən hansısa digər bazanın yerləşdirilməsi qeyri-mümkündür. Ötən həftə Ermənistan parlamenti Avropa İttifaqına üzv olmaq üçün də müraciət etmişdi. Yəni artıq ABŞ həmçinin Ermənistanda guya nüvə əməkdaşlığına başlayacaq, danışıqlara gedəcək, Metsamor Atom Elektrik Stansiyasından əlavə olaraq bir sıra kiçik atom elektrik stansiyalarının tikintisinə başlayacaq, guya gələcəkdə ekstrimist İslam dövləti, yəni İŞID-lə mübarizədə onlar tərəfdaşlıq müqaviləsi imzalayacaqlar. Bunun hamısını isə zaman göstərəcək. Trampın andiçmə mərasimindən sonra Ermənistandan necə istifadə olunacaq və regiona hansı təsirlər göstərəcək məsələsi gündəmdədir. Azərbaycan təbii ki, öz daxili və müstəqil xarici siyasətini həyata keçirir, Cənubi Qafqazda vəziyyətə nəzarət etmək üçün bilir ki, Ermənistandan istifadə olunur, burada güclü strateji tərəfdaşlıq planları axtarmağa dəyməz”.

Müsahibimiz qeyd etdi ki, Ermənistan bu gün tənəzzülə uğramış iqtisadiyyatı, siyasəti, hərbi potensialı ilə ABŞ-yə heç vaxt tərəfdaş ola bilməz:

“Lakin paralel olaraq, qeyd etməliyəm ki, Ermənistandan ciddi şəkildə istifadə olunur və bu ölkənin bugünkü mövqeyi çox acınacaqlı sona gətirib çıxara bilər. Digər tərəfdən , ABŞ-Ermənistan arasında imzalanmış sənəd zənnimcə, bu ölkə üçün maliyyə yardımlarının ayrılması, silah və texnikanın verilməsi, hərbi təhsil, birgə təlimlərin keçirilməsi kimi məsələlərə xidmət edə bilər. Amma Tramp administrasiyasının buna necə yanaşacağı məlum deyil. ABŞ belə sənədi vaxtilə Gürcüstanla da imzalamışdı və ötən il iki ölkə arasında nələrin baş verdiyinin şahidi olduq. Yəni hər şey siyasi konyunkturdan asılı olaraq cərəyan edəcək. Bu gün Rusiyanın verdiyi bəyanatlar göz qabağındadır. Təəccüb doğuran məsələ də odur ki, İran susur”.

Günay Rəsulqızı