“Ukrayna Rusiya ərazilərinə zərbələr endirsə də, faktiki olaraq öz ərazilərindəki cəbhə xətlərini dəyişməyə nail olmayıb”.

Bunu Sfera.az-a açıqlamasında siyasi ekspert Aqşin Kərimov deyib. O, sözügedən məsələnin üç əsas səbəbini sadalayıb.

“Bunlardan biri, Ukrayna qoşunlarında canlı qüvvə çatışmazlıqlarının hökm sürməsidir. Həmçinin Ukraynaya verilən silahlar Rusiyanın aşkar hərbi üstünlükləri qarşısında tarazlıq yarada bilmir. Ukrayna döyüşləri yenidən qruplaşdırmaq və yeniləmək üçün Rusiyanın müdafiə istehkamlarını yarmaq potensialından uzaqlaşır. Ümumiyyətlə, Kiyevdə də, Moskvada da danışıqlara dair fikir ayrılıqlarının hökm sürdüyünü demək olar. Bunların fonunda yayılan bir neçə informasiya mümkün müzakirələrin əhatə dairəsini təsvir etməyə şərait yaradır. Məsələn, Rusiya Prezidenti Vladimir Putin Ukraynanı təcrid etmək və NATO-nu zəiflətmək üçün müharibədən əvvəlki maksimalist tələblərini saxlayır. Putin eyni zamanda, Ukraynada müharibənin dayandırılması ilə bağlı Qərb liderləri ilə istənilən mümkün danışıqlarda bu tələbləri yerinə yetirməyi hədəfləyir. “Financial Times 10” da Kremlin keçmiş yüksək rütbəli rəsmisinə və Putinlə bu mövzunu müzakirə edən başqa mənbəyə istinadən yazıb ki, Putin Ukraynanın NATO-ya üzvlüyünə mane olmaq kimi müharibədən əvvəlki tələblərini davam etdirəcək”.

Ekspert qeyd etdi ki, Kiyev istənilən nizamlanmanın mərkəzində atəşkəsə nəzarət oluna biləcəyinə dair qısamüddətli təminatlar almaqla, daha uzunmüddətli təminatlara dayanan xətlərlə danışıqlara getməyə çalışır:

“Donald Trampın Ukrayna üzrə nümayəndəsi Keyt Kelloq keçən həftə 100 gün ərzində münaqişənin həlli üçün möhkəm və davamlı həll yolu tapacağına ümid etdiyini bildirib. Ukraynanın bu şərtlərlə qismən razı olduğunu demək mümkündür. Lakin Moskvanın dəyişməz hədəflərinin Tramp administrasiyasının planları ilə necə üst-üstə düşdüyü bəlli deyil. Fikrimcə, Ukraynanın taleyi Tramp-Putin danışıqlarının nəticəsində daha proqnozlaşdırıla bilən xarakterdə olacaq”.

Günay

"Tramp-Putin danışıqları Ukraynanın taleyini həll edə bilər" - ŞƏRH