“Krokus terroru”, eləcə də rus general İqor Kirillovun ölümündən sonra Rusiyada miqrantlara təzyiqlər artıb. Yeni ilin ilk günü, yəni yanvarın 1-dən Rusiya Federasiyasında miqrasiya sahəsində yeni qaydalar qüvvəyə minib. Belə ki, bu tarixdən etibarən Azərbaycan Respublikası vətəndaşlarının Rusiya Federasiyası ərazisində müvəqqəti qalma müddəti bir təqvim ili ərzində cəmi 90 gün olacaq. Bundan başqa, rus dilini bilmək öhdəliyi tətbiq ediləcək. Hətta bu dili bilməyən uşaqların orada məktəbə getməsi qadağan olunub.

Maraqlıdır, bu qərarın Rusiya iqtisadiyyatına təsiri necə olacaq?

Mövzu ilə bağlı Sfera.az-a açıqlamasında iqtisadçı ekspert Eldəniz Əmirov bildirib ki, Rusiyanın miqrantlara qarşı qaydaları sərtləşdirməsi ən böyük zərbəni elə Rusiyanın özünə vuracaq:

"Əvvəla ona görə ki, onsuz da artıq Rusiyada ciddi demoqrafik problemlər mövcuddur. Əhalinin azalması və yaşlanması qarşısı alınmaz hala gəlib. Yeni qaydalar miqrant axınını azaldaraq bu problemləri daha da dərinləşdirəcək. Digər tərəfdən, Rusiyada ciddi işçi qüvvəsinin çatışmazlığı mövcuddur. Bu qərar tikinti, kənd təsərrüfatı və sənayedə daha da cətin vəziyyət yaradacaq. Çünki bu sektorlarda işçi qüvvəsi çatışmazlığı artacaq. Bu isə ümumi iqtisadi artım tempini belə ləngidə bilər".

Ekspert qeyd edib ki, illeqal fəaliyyət zərurətə çevrildiyi üçün qeyri-rəsmi fəaliyyət artacaq və bu da vergidən yayınma hallarını artıraraq dövlət büdcəsinə mənfi təsir göstərəcək:

"Düzdür, bu böyük rəqəm olmasa da, heç bir dövlətin xoşlamadığı qarabazar sisteminin çiçəklənməsi üçün münbit mühit yaradacaq. Digər bir mənfi təsir kimi, miqrantlara qarşı sərt qaydaların Rusiyanın imicini daha da zədələcəyini göstərə bilərik. Həmçinin miqrant ölkələrlə, ələxsus da miqrantların əsas mənbəyi olan Orta Asiya ölkələri ilə əməkdaşlığa mənfi təsir göstərəcək. Buna görə də Rusiya miqrantlarla bağlı qaydaları sərtləşdirmək əvəzinə, onların iqtisadi inteqrasiyasını asanlaşdıran mexanizmlər yaratmaqla demoqrafik göstəricilərini, işçi qüvvəsi çatışmazlığını, şəffaflığı, miqrant ölkələrlə münasinətlərini və ən nəhayət siyasi imicini yaxşılaşdıra bilərdi. Amma əksini etdi".

Firuzə Əliyeva

Sfera.az

Miqrasiya sahəsində YENİ QAYDALAR: Yeni qərar Rusiya iqtisadiyyatına necə təsir edəcək?