Son günlər Cənubi Koreyada vəziyyət gərginləşir. Belə ki, prezident Yun Sok Yol müxalifəti Şimali Koreyaya rəğbət bəsləməkdə ittiham edərək ölkədə hərbi vəziyyət elan edib və ordunu paytaxt Seula yeridib.

Bununla bağlı Sfera.az-a açıqlama verən siyasi şərhçi Zeynal Əmrəliyev deyib ki, Koreyanın şimalında sərt rejim fəaliyyət göstərsə də, cənubda siyasi vəziyyət normal deyil. Onun sözlərinə görə, ölkədə siyasətlə məşğul olmaq demək olar, bəladır:

“Ölkənin az qala bütün keçmiş prezidentlərinə qarşı müxtəlif ittihamlarla cinayət işi açılıb. Məsələn, 2018-ci ildə ölkə prezidenti Park Geun Hye vəzifəsindən uzaqlaşdırıldı. Xanım prezidentə səlahiyyətini sona qədər icra etməyə imkan verilmədi və 24 il müddətinə həbs edildi. Elə həmən il, 2018-ci ildə Koreya məhkəməsi Geun Hyenin sələfi Li Myong Bakı həbs edərək 17 illik həbsə məhkum etdi. 2022-ci ildən bəri hakimiyyətdə olan Sok Yola qarşı ölkədə çox ciddi narazılıq var. Xatırladım ki, Park Geun Hyenin vəzifədən uzaqlaşdırılmasının təşəbbüskarı məhz indiki prezident olub. Sok Yol o zaman ölkənin baş prokuroru vəzifəsində çalışırdı. “Xalqın Gücü Bloku” növbəti seçkidə onu namizəd kimi göstərdi və qalmaqallı seçkidə Sok Yol ölkə prezidenti seçildi. Son 2 ildə Yun Sok Yol yuxarı təbəqənin mənafeyini müdafiə edərək orta və kiçik biznes təbəqəsinin mənfəətinin azalmasına səbəb olub. O, təhlükəsizlik elitasına ciddi şəkildə dəstək verərək onların mövqelərinin güclənməsinə şərait yaradıb. Bu isə siyasi dairələrdə həyəcanla izlənilirdi”.

Ekspert bildirdi ki, müxalifət uzun müddətdir, dövlət başçısının həbsi istiqamətdə fəaliyyət göstərirdi:

“Görünür, kimlərsə Sok Yolun qulağına sərt rejim yaratmaq barədə nələrsə pıçıldayıb. O yaxşı bilir ki, vaxtında hərəkət etməsə, onu da sələflərinin aqibəti gözləyir. Cənubi Koreyada Şimali Koreyaya rəğbətin artması barədə iddialar isə tamamilə absurddur. Cənubi Koreyə ABŞ-nin nəzarətində olan ölkədir. Ehtimal ki, baş verənlər Ağ Evlə razılaşdırılıb. Bu da Co Baydenin getməyinə az qalmış, dünyaya yeni hədiyyəsi hesab edilə bilər. Baş verənlər Koreya yarımadasında gərginliyin açıq fazaya keçməsinə şərait yarada bilər. Əgər ABŞ prosesə müdaxilə etməsə, ölkədə xalq inqilabının yaşanması mümkündür. Müxalifət liderləri artıq Yun Sok Yolun hakimiyyətini qeyri-qanuni elan ediblər. Nəzərə almaq lazımdır ki, müxalifətin gücü çoxdur”.

Günay Rəsulqızı

"Əgər ABŞ prosesə müdaxilə etməsə, xalq inqilabı başlayacaq..." - Cənubi Koreyada nələr olur?