ABŞ Rusiyanın dərinliklərinə zərbələr endirmək üçün “Storm Shadow” raketlərinin istifadəsinə etirazını geri götürüb. Bu barədə “The Times” qəzeti rəsmi dövlət mənbələrinə istinadən yazır.

Sfera.az nəşrə istinadən xəbər verir ki, Böyük Britaniyanın baş naziri Keir Starmerin “Storm Shadow” raketlərinin istifadəsi ilə bağlı mövqeyi son günlər dəyişib. Baş nazirin davranışları bu raketlərdən istifadəyə etiraz etməyəcəklərini göstərir.

Nəşr xatırladır ki, 2024-cü ilin sentyabrında Böyük Britaniya baş naziri belə bir qərarı istisna etmişdi, G20 sammitindən əvvəl isə bununla bağlı suala cavab vermək istəməyib.

“The Times” qəzetinin yazdığına görə, ABŞ raket zərbələrinə etirazını dayandırdıqdan sonra Starmerin fikirləri dəyişib. Fransanın “Le Figaro” nəşri isə noyabrın 17-də hökumətdəki mənbələrə istinad etmədən yazıb ki, Britaniya və Fransa Rusiyaya hücum etmək üçün Ukraynaya “Storm Shadow” və onun fransız analoqu SCALP-dən istifadə etməyə icazə verib.

Bundan əvvəl “The New York Times”da Baydenin ATACMS-dən istifadəsinə qoyulan məhdudiyyətlərin aradan qaldırılması ilə bağlı bir xəbər yayılıb. Lakin bir gün sonra “Le Figaro” bu məlumatı silib və Fransa Xarici İşlər Nazirliyi Parisin mövqeyini dəyişmədiyini bildirib.

Bir gün əvvəl Fransanın “Le Monde” nəşri mənbələrə istinadən yazıb ki, Fransanın Ukraynaya tədarük edə biləcəyi məhdud sayda SCALP raketləri var. Bununla belə, qəzetin yazdığına görə, Londonun ixtiyarında daha çox bu raketlər olduğundan Paris indi Britaniya ilə Kiyevə uzaqmənzilli raketlərin verilməsini müzakirə edir.

Rusiya Müdafiə Nazirliyi dünən Ukrayna Silahlı Qüvvələrinin Rusiyadakı obyektdə Amerika istehsalı olan ATACMS raketlərindən istifadə etdiyini açıqlayıb. Nazirlik Bryansk vilayətində beş ədəd belə raketin vurulduğunu, birincin isə zədələndiyini açıqlamışdı. Xarici işlər naziri Sergey Lavrov bunu “eskalasiya siqnalı” adlandırıb.

Beləliklə, Ukrayna üç ölkənin uzaqmənzilli raketlərindən istifadə hüququnu əldə edib. Bu raketlər 300-500 km dərinlikdə Rusiyanın mövqelərinə zərbə endirməyə imkan yaradacaq. “Storm Shadow” və SCALP-EG, 2001-ci ildən istifadə edilən uzun mənzilli havadan atılan qanadlı raketdir.

Belə raketlər 1000 km/saatdan çox sürətə malikdir və təxminən 500 km məsafədəki hədəfləri vurmaq iqtidarındadır. Böyük Britaniya və Fransa bu cür raketləri 2023-cü ildən Ukraynaya verir. ABŞ-nin verdiyi ATACMS-lar isə maksimum 300 km mənzilli yer-yer tipli idarə olunan raketlərdir.

ATACMS-in Ukraynaya köçürülməsi ilk dəfə 2023-cü ilin oktyabrında ABŞ tərəfindən rəsmi olaraq elan edilib.

Vasif

Sfera.az

Ukrayna bu raketlərlə də Rusiyanı vura biləcək! - RAZILIQ VERİLDİ