Türkiyədə Milliyyətçi Hərəkat Partiyasının (MHP) lideri Dövlət Baxçalının son açıqlamaları gərginliyə səbəb olub. Belə ki, Türkiyənin paytaxtı Ankara şəhərinin Polis İdarəsində bir neçə vəzifəli şəxs işdən çıxarılıb. Baxçalı isə bu prosesi “sui-qəsd” kimi qiymətləndirib.

"Bu günlərdə daxili işğal cəbhəsində toplanmış, polis və ədliyyə orqanlarına yerləşdirilmiş alçaq və kripto quldur dəstələri yenidən Türkiyə ilə bağlı planlar qururlar", - o, partiyasının fraksiya toplantısında deyib. Baxçalı belə cəhdlərin “ağır nəticələri” olacağı barədə xəbərdarlıq edib.

Mətbuat və ekspertlər Baxçalının çıxışını Türkiyədə çevrilişə cəhdə qarşı xəbərdarlıq kimi dəyərləndirib.

Bununla bağlı Sfera.az-a açıqlama verən politoloq Məhəmməd Əsədullazadə deyib ki, Türkiyə beynəlxalq güc yolunda inamla irəliləyir:

“Ankaranın müstəqil siyasəti və hərbi sənayesini inkişaf etdirməsi onun hədəfə gəlməsinə gətirib çıxarır. Bu çevrilişin arxasında FETÖ olduğu istisna edilməməlidir. Bu təşkilat tam sıradan çıxarılmayıb. Bir neçə ölkədə və Türkiyənin özündə hücrələri fəaliyyət göstərir”.

Ekspert xatırladıb ki, Türkiyə ordusunda FETÖ ilə bağlı ciddi təmizləmə olub:

“2016-cı ildə polis ordunun çevriliş cəhdinin qarşısını aldı. Görünür, FETÖ polis sistemində iş aparmağı hədəfləyib. FETÖ rəhbəri Fətullah Gülən ABŞ-dədir və fəaliyyətini davam etdirir. Fikrimcə, Türkiyədə polislərlə bağlı ciddi təmizləmə işləri həyata keçiriləcək. Ankaranın Şimali İraqda PKK əleyhinə planlaşdıran genişmiqyaslı hərbi əməliyyatlar öncəsi çevriliş cəhdi bu əməliyyata yönəlib”.

Günay