Baydenin son qərarı Yaxın Şərqdəki vəziyyəti GƏRGİNLƏŞDİRİR: “Sonu faciəvi ola bilər” 

Ötən günlərdə İordaniyanın şimal-şərqində pilotsuz uçuş aparatı ilə ABŞ hərbi bazasına edilən hücum hələ də dünya mediasının müzakirə obyektidir. Xüsusilə Vaşinqtonun verəcəyi cavab hər kəsə maraqlıdır. Bu fonda, dünən Ağ Ev rəhbəri Co Bayden İordaniya və Suriya sərhədindəki Ət-Tanf bölgəsində Amerika bazasına edilən hücuma cavab vermək barədə qərar qəbul edib.

Maraqlıdır, Yaxın Şərqdə münaqişə ocağı genişlənə bilərmi? Baydenin qərarı hansı nəticələrə səbəb olacaq?

Bununla bağlı Sfera.az-a açıqlama verən politoloq İlyas Hüseynov qeyd edib ki, ABŞ Yaxın Şərqdə cərəyan edən proseslər müstəvisində HƏMAS-İsrail arasında olan müharibənin lokal xarakter daşımasına çalışırdı:

“Bütün səylər İranın birbaşa münaqişəyə müdaxilə etməməsinə yönəlmişdi. Tehranın proksi qüvvələr qismində iştirak etməsi hamıya aydındır, amma özü birbaşa müdaxilə edərsə, bu, Yaxın Şərqdə geniş müharibəyə gətirib çıxara bilər. Rusiya-Ukrayna müharibəsi ilə yanaşı, digər savaşın geniş miqyas alması isə ABŞ-nin maraqları çərçivəsində deyil. Bu xüsusda aviadaşıyıcıların bölgəyə göndərilməsi, müxtəlif siyasi bəyanatlar, primitiv tədbirlər həm də münaqişəni lokallaşdırmağa gətirib çıxardı. Lakin husilərin Ədən körfəzində ticarət gəmilərinə hücumları, ardınca qısamüddətli İran-Pakistan gərginliyi, Suriya və İraqda hədəflərin bombalanması ABŞ-nin bazalarının da hücuma məruz qalmasına şərait yaratdı”.

Müsahibimiz deyib ki, proksi qüvvələr təhdid altındadır və münaqişəyə cəlb olunublar:

“Müxətlif qruplaşmalar, güc mərkəzləri, hərbi iştirak payı olan bazalar hədəfə alınır və bu, bir-birinin ardınca sistematik müşahidə olunur. ABŞ hazırda məhz bazalarının hücuma məruz qalması müstəvisində cavab tədbirlərini həyata keçirməkdə maraqlıdır. Bunu da açıq şəkildə bəyan edir. Bu isə ABŞ-nin çəkindirici funksiyalarına ziddir. Ona görə də qarşıdakı dönəmdə münaqişəyə güclü geopolitik aktorların birbaşa müdaxilə edəcəyi, ümumi bölgənin gərginliyinin artırılmasına təkan vermələri gözlənilir. Əlbəttə, bunun sonu görünmür və daha da faciəvi ola bilər”.

Günay