Avropa Parlamentinə “Dağlıq Qarabağın blokadasının humanitar nəticələrinə dair” qətnamə təqdim edilib. Sənəd dünən müzakirə olunub, səsvermə isə bu gün keçiriləcək.

Qətnamənin müəllifləri Avropa Parlamentinin deputatları – Viola fon Kramon-Taubadel, Mişel Rivazi, Sara Viner, İqnazio Korrao, Hanna Neuman, Ana Miranda, Roza D'Amato, Fransisko Qerreyro, Jordi Sole, Marketa Qreqorova, Tineke Strikdir.

Mövzu ilə bağlı Sfera.az-a açıqlama verən politoloq Zaur Məmmədov deyib ki,  Avroparlamentin ermənipərəst nümayəndələri dünənki addımları ilə Avropa İttifaqı-Azərbaycan münasibətlərinə xələl gətirmək niyyətilərini nümayiş etdiriblər. Müsahibimiz qeyd edib ki, layihənin əleyhinə səs vermələri üçün onların sabaha kimi vaxtları var:

“Dünən Avroparlament tərəfindən Laçında baş verənlərlə bağlı ölkəmizi günahlandıran layihə ilə çıxış etmələri, Azərbaycandan dəhlizi açmaq istənilməsi və Bakını Dağlıq Qarabağdakı ermənilərin hüquqlarının qorunmasına çağırması, Ermənistanın ərazi bütövlüyünün toxunulmazlığı, Azərbaycan ordusunun Ermənistan ərazisindən çıxarılması kimi tələblərin layihəyə salınması  qərəzli və birtərəfli münasibətin bariz nümunəsidir. Bunların bizim üçün heç bir mənəvi, siyasi, hüquqi çəkisi yoxdur. Lakin bununla Fransa və Ermənistan Aİ-nın prezidenti Şarl Mişelin son bir ildə effektiv vasitəçi kimi nailiyyətlərinin üstündən xətt çəkmiş olur.

Görünən odur ki, Şarl Mişel və Fon Layen kimi fiqurlara qarşı erməni diasporası, Fransa hökuməti tərəfindən təzyiq mexanizmi məhz Avroparlament, Avropa Komissiyası səviyyəsində işə salınıb və bu cür avantürist çıxışlar davamlı olacaq”.

Ekspert qeyd edib ki, Avroparlamentin dünən hazırladığı layihə mətni qəbul edilərsə, Azərbaycan-Aİ arasında yeni sazişin imzalanma tarixi ertələnə bilər:

“Bu gün Avroparlamentin bir çox üzvü  erməni diasporası tərəfindən maliyələşdirilirlər. Ötən ilin sonunda Avroparlamentdə bəzi ölkələrlə bağlı araşdırılmaların da başlanılması buna sübutdur. Ancaq digər ölkələrin rüşvət məsələsində adları çəkilsə də, erməni milyonçuları ilə bağlı susqunluq nümayiş etdirilir”.

Xatırladaq ki, Avropa Parlamentinin qətnaməsi məcburi qüvvəyə malik deyil və məsləhət xarakteri daşıyır.

Günay Rəsulqızı