Tatular xərçəng yaradır? – Onkoloqdan AÇIQLAMA
Son illər həm dünyada, həm də Azərbaycanda tatulara maraq artır. Bəzi insanlar sadəcə bədəninə deyil, hətta göz bəbəyini də tatu etdirir.
Bu dəb axınının arxasında sağlamlıq üçün təhlükə olub-olmaması mübahisə mövzusudur. Qərb ölkələrində aparılan bir sıra araşdırmalarda bildirilir ki, tatu bəzən insan orqanizmində ciddi xəstəliklərə səbəb ola bilər. Bunlara QİÇS, Hepatit B, C, D virusları, allergik reaksiyalar və hətta xərçəng riski də daxildir.
Mövzu ilə bağlı Sfera.az-a açıqlama verən tibb üzrə fəlsəfə doktoru, onkoloq Fərid Museyibovun sözlərinə görə, tatuların sağlamlığa ciddi təsirləri ola bilər:
“Xərçəngin bir çox səbəbləri var və onlardan biri də travmalardır. Bu travmalar arasında dəriyə edilən müdaxilələr də var. Tatu da dəriyə edilən müdaxilədir. Tatu etdirmək zamanı yoluxucu xəstəliklərin ötürülməsi riski yüksəkdir. Hepatit B, C, QİÇS kimi xəstəliklər bu yolla keçə bilər. Xüsusilə hepatit virusları qaraciyər xərçəngi riskini artırır”.
Həkim dedi ki, tatu dəriyə birbaşa travma sayıldığı üçün dəri xərçəngi – melanomanın yaranma ehtimalını da artırır:
“Melanoma adlanan dəri xərçəngi dəriyə təkrarlanan travmalar nəticəsində inkişaf edə bilər. Tatu bu baxımdan da risk daşıyır”, – deyə Fərid Museyibov əlavə edib.
Həkim vətəndaşlara xəbərdarlıq edərək, bu cür zərərli vərdişlərdən uzaq durmağı tövsiyə edir:
“İnsanlar anlamalıdır ki, dəbə uymaq naminə sağlamlıqlarını təhlükəyə atmamalıdırlar. Tatu sadəcə bədii görüntü deyil, onun arxasında real tibbi risklər dayanır”.
Bəsti Rəfizadə
Sfera.az
