Yay aylarında artan temperatur və rütubət fonunda insanların ən çox müraciət etdiyi kosmetik məhsullardan biri dezodorantlardır. Satışa çıxarılan dezodorantların bir çoxunun tərkibində alüminium birləşmələr olur. Belə dezodorantların insan sağlamlığına zərər vurduğuna dair iddialar var. Bu da bir çox insanı alternativ məhsullara və təbii vasitələrə yönəldir.

Mövzu ilə bağlı Sfera.az-a açıqlama verən dermatoveneroloq Cavad Paşabəyli məhsul seçərkən diqqətli olmağı tövsiyə etdi.

Onun sözlərinə görə, insanlar antiperspirant və dezodorantlardan istifadə edərkən ilk növbədə öz dəri tiplərini nəzərə almalıdırlar. Həkim deyir ki, xüsusilə də atopik dermatit, psoriaz və digər həssas dəri problemləri olan şəxslər bəzi kosmetik maddələrə qarşı reaksiya verə bilər:

“Bu cür dəriyə sahib insanlar ətirli, spirtli və tər vəzi zəiflədici tərkibə malik məhsullardan istifadə etdikdə dəridə qızartı, qaşınma, qabıqlanma, səpgilər və digər allergik reaksiyalar müşahidə oluna bilər”.

Mütəxəssis xüsusi olaraq dezodorantların tərkibində olan alüminium duzlarının potensial təhlükəsinə diqqət çəkir:

“Alüminium duzları tər vəzilərini müvəqqəti bloklayaraq tərləməni azaldır. Lakin uzun müddət istifadəsi dəridə nəfəsalma qabiliyyətini zəiflədir, bu da bakteriyaların çoxalması və infeksiyaların yaranması üçün zəmin yaradır. Bu halda, "hidradenit" adlanan iltihabi xəstəlik inkişaf edə bilər. Bundan əlavə, bəzi elmi araşdırmalar alüminium tərkibli məhsulları süd vəzi xərçəngi riskilə əlaqələndirir. Bu səbəbdən də bu tip məhsullardan istifadə zamanı ehtiyatlı olmaq lazımdı”.

Təhlükəsiz alternativlər hansılardır?

Son dövrlərdə təbii tərkibli dezodorantlara tələbat artıb. Bitki əsaslı, soda və kokos yağı tərkibli məhsullar alüminium və digər kimyəvi qatqılardan uzaq olmaqla yanaşı, pis qoxunun qarşısını almaqda da təsirli ola bilər. Mütəxəssis bu alternativləri xüsusilə həssas dəriyə sahib şəxslərə məsləhət görür:

“Təbii tərkibli dezodorantlar dəriyə daha zərif təsir göstərir və uzunmüddətli istifadədə fəsad riski aşağıdır. Tərkibində soda, qarğıdalı nişastası, çay ağacı yağı, lavanda yağı olan məhsullar pis qoxunu neytrallaşdırmaq üçün effektiv sayılır”.

Tər ifrazını azaltmaq üçün istifadə olunan alternativ üsullardan biri də botoks inyeksiyalarıdır. C.Paşabəylinin sözlərinə görə, bu prosedur xüsusilə qoltuqaltı bölgəsində artıq tərləmədən əziyyət çəkənlər üçün effektiv və təhlükəsiz metod sayılır. Botoks vasitəsilə tər vəzilərinin fəaliyyəti müvəqqəti olaraq zəiflədilir. Nəticədə, 6-12 ay ərzində həmin nahiyədə tərləmə xeyli azalır. Bu metod kimyəvi məhsullara qarşı həssaslığı olan şəxslər üçün uyğun alternativ ola bilər.
Sonda mütəxəssis vacib bir detalı da vurğulayıb - tərləmə orqanizmin təbii müdafiə mexanizmidir və onun qarşısını tamamilə almaq düzgün deyil:

“Tərləmə bədənin temperatur tənzimləmə sistemidir. Onu tamamilə dayandırmaq əvəzinə, sağlam və təhlükəsiz üsullarla idarə etmək lazımdır. Hər məhsul hər kəs üçün uyğun deyil. Məhsul seçərkən tərkibi diqqətlə oxuyun və dəri tipinizə uyğun olanları seçin”.

Bəsti Rəfizadə
Sfera.az

Yayda dezodorant təhlükəsi: Alüminium tərkibli məhsullar risklər yaradır